Ուկրաինան և ՌԴ-ն հայտնել են ԱԹՍ-ների հարձակման մասին

ՌԴ Պաշտպանության նախարարությունը հայտնել է երկու շրջաններում 14 անօդաչու թռչող սարքերի ոչնչացման մասին։ Ուկրաինայի զինված ուժերը հայտնում են 36 «Շահեդ»-ներից 22-ը խոցելու մասին, գրում է Current Time-ը։

ՌԴ ՊՆ-ն նշում է, որ մարտի 14-ի գիշերը ՀՕՊ համակարգերը Բելգորոդի և Կուրսկի շրջաններում ոչնչացրել և որսացել են 14 անօդաչու թռչող սարք։ Ռուս զինվորականները, մինչ այդ, անօդաչու սարքերով հարվածներ են հասցրել Ուկրաինայի տարածքին. ուկրաինական ԶՈՒ-ն հայտնում է, որ խոցել են գործարկված 36 անօդաչու թռչող սարքերից 22-ը։

ՌԴ ռազմական գերատեսչության տվյալներով՝ 11 անօդաչու թռչող սարք է խոցվել Բելգորոդի, 3-ը՝ Կուրսկի շրջանում։ Ռուսական ՊՆ-ն նաև հավելել է, որ բոլոր անօդաչու սարքերը եղել են ինքնաթիռային տիպի։

Գիշերը Կուրսկի մարզի նահանգապետ Ռոման Ստարովոյտը հայտնել է, որ Կուրսկ քաղաքում և Կուրսկի շրջանում հակաօդային պաշտպանության համակարգ է գործում։

Մարտի 14-ի առավոտյան Բելգորոդի վրա անօդաչու թռչող սարքի հարձակման մասին հայտնել է նաև Բելգորոդի նահանգապետ Վյաչեսլավ Գլադկովը։ Նրա խոսքով՝ մեկ մասնավոր տնային տնտեսության ապակիներ են կոտրվել, իսկ անօդաչու թռչող սարքի անկումը հանգեցրել է չոր խոտի հրդեհի։ Նա հավելել է, որ տուժածներ չկան, կրակը մարվել է։

Ավելի վաղ Գլադկովը հայտնել էր, որ ինքնաթիռային տիպի երկու ԱԹՍ-ներ հարձակվել են Բելգորոդի շրջանի Պրոխորովկա գյուղի վրա։ Նրա խոսքով՝ անօդաչուները պայթել են ընկնելուց հետո։ Առաջին պայթյունի հետևանքով առանձնատան տանիքը, որում ոչ ոք չէր ապրում, հրդեհվել է, ասել է Գլադկովը, իսկ երկրորդ անօդաչու սարքը վնասել է հարևան տան ճակատն ու ցանկապատը։ Հարձակման հետևանքով ոչ ոք չի տուժել։

Մի քանի ժամ անց Բելգորոդում և Բելգորոդի շրջանում հրթիռային հարձակման տագնապ է հայտարարվել։

Ուկրաինայի զինված ուժերի գլխավոր շտաբն իր հերթին հայտնում է, որ մարտի 14-ի գիշերը ռուսական բանակը հարվածել է Ուկրաինային 36 «Շահեդ» անօդաչու թռչող սարքերով, որոնցից 22-ը հաջողվել է խոցել։

Սումիի շրջանային վարչակազմը հայտարարել է, որ ԱԹՍ-ները հարվածել են տարածաշրջանի չորս քաղաքների՝ Սումիի, Շոստկայի, Ախտիրկայի և Բելոպոլիեի ենթակառուցվածքներին: Խարկովի քաղաքապետ Իգոր Տերեխովը նաև գրել է քաղաքի թաղամասերից մեկում անօդաչու թռչող սարքի հարվածի մասին։

Զոհերի և ավերածությունների մասին տեղեկություններ չկան։