12.08.2026 | 13:58
Նարեկ Կարապետյանի ճեպազրույցը. ՈՒՂԻՂ
ՌԴ շրջանների վրա ավելի քան 50 ԱԹՍ է հարձակվել․ Ռյազանում նավթագործարան է հրդեհվել
Քաղաքականություն
13.03.2024 | 12:53
Մարտի 13-ի գիշերը մի քանի տասնյակ անօդաչու թռչող սարքեր հարձակվել են ՌԴ շրջանների վրա: Մասնավորապես, Ռյազանում անօդաչու սարքերը հարձակվել են նավթավերամշակման գործարանի վրա, գրում է Meduza-ն:
Նահանգապետ Պավել Մալկովի տեղեկացմամբ՝ հարձակման հետևանքով հրդեհ է բռնկվել, կան տուժածներ։ Այլ մանրամասներ նա չի հայտնել։
«112» տելեգրամ-ալիքի հաղորդմամբ՝ երեք անօդաչուներ հարձակվել են «Ռոսնեֆտի» դուստր «Ռյազաննեֆտեպրոդուկտ» գործարանը։ Ըստ տարբեր տվյալների՝ հրդեհի տարածքը կազմել է 100-200 քառակուսի մետր։
Հարձակման հետևանքով երկու մարդ է հոստպիտալացվել․ նրանց վիճակը միջին ծանրության է։
Վորոնեժի շրջանում էլ ՀՕՊ ուժերն ավելի քան 30 ԱԹՍ են խոցել, հայտնել է շրջանի ղեկավար Ալեքսանդր Գուսևը։ Ըստ նրա՝ մի շարք բնակավայրերում վնասվել են ենթակառուցվածքներն ու բնակարաններ, Բուտուրլինկովսկի շրջանում՝ սեփական տուն ու ենթակայան։ Տուժածներ չկան։
Լենինգրադի մարզում, նահանգապետ Ալեքսանդր Դրոզդենկոյի հաղորդմամբ, ՀՕՊ ուժերը Կիրիշիի շրջանում «ԿԻՆԵՖ» նավթավերամշակման գործարանին մոտեցող անօդաչու թռչող սարք են խոցել։ Տուժածներ և ավերածություններ չկան։
Բելգորոդի շրջանի ղեկավար Վյաչեսլավ Գլադկովն էլ հայտնել է, որ գիշերվա ընթացքում ՀՕՊ-ն առնվազն 6 ԱԹՍ է խոցել, երկուսը՝ Սերեբրյանկա գյուղի, երկուսը՝ Բոգոսլովկայի, մեկը՝ Գուբկինեի քաղաքի, մեկը՝ Կրուգլոյե գյուղի տարածքում։ Ոչ ոք չի տուժել, վնասվել են բնակելի տներ։
Շեբեկինո քաղաքում տուժել է արդյունաբերական ձեռնարկության աշխատակիցը, վնասվել են բնակելի շենքեր և էլեկտրահաղորդման գծեր։
Բրանսյկի շրջանում էլ 8 ԱԹՍ է խոցվել, հայտնել է նահանգապետ Սերգեյ Բոգոմազը։ Տուժածներ և ավերվածություններ չկան։
Կուրսկի ղեկավար Ռոման Ստարովոյտն էլ հայտնել է 6 ԱԹՍ-ի խոցման մասին։
Լիպեցկի շրջանի իշխանությունները նույնպես հայտնել են անօդաչու թռչող սարքերի հարձակման մասին։ Նահանգապետ Իգոր Արտամոնովը հայտարարել է, որ իշխանությունները տեղեկություններ են ստանում «Լիպեցկի շրջանի վրա անօդաչու թռչող սարքերի հնարավոր հարձակումների մասին»։
