07.10.2026 | 23:19
Հայաստանը ՄԱԿ-ում ընդգծել է զարգացող երկրների համար միջազգային աջակցության և ֆինանսավորման կարևորությունը
Հայիթիի վարչապետը հրաժարական է տվել
Քաղաքականություն
12.03.2024 | 16:33
Հայիթիում զանգվածային անկարգությունների ֆոնին վարչապետ Արիել Անրին հայտարարել է իր հրաժարականի մասին, գրում է DW-ի ռուսական ծառայությունը։
«Կառավարությունը, որը ես ղեկավարում եմ, չի կարող անտարբեր մնալ ներկա իրավիճակի նկատմամբ: Ոչ մի զոհաբերություն հանուն մեր երկրի չի կարող չափազանց մեծ լինել: Իմ կառավարությունն անհապաղ կհեռանա, հենց որ անցումային խորհուրդ ստեղծվի»,- ասել է Անրին՝ հրապարակված տեսաուղերձում:
Արիել Անրին հայտարարությունն արել է հարևան Ջամայկայում Կարիբյան համայնքի (CARICOM) ներկայացուցիչների և ԱՄՆ պետքարտուղար Էնթոնի Բլինքենի միջև հանդիպումից ժամեր անց, որտեղ որոշվել էր Հայիթիում անցումային խորհուրդ ստեղծել։
Հայիթիում անկարգություններ են սկսվել փետրվարի վերջին Անրիի՝ Քենիա կատարած այցի ժամանակ։
Հայիթիի միջազգային օդանավակայանների փակման պատճառով Անրին այդպես էլ չի կարողացել տուն վերադառնալ։ Նա Պուերտո Ռիկո է ժամանել անցյալ շաբաթ այն բանից հետո, երբ թույլ չեն տվել նրա ինքնաթիռը վայրէջք կատարի Դոմինիկյան Հանրապետությունում՝ համաձայնեցված թռիչքի պլանի բացակայության պատճառով: Դոմինիկյան Հանրապետությունը նաև փակել է իր օդային տարածքը դեպի Հայիթի և հակառակ ուղղությամբ թռչող ինքնաթիռների համար:
