07.10.2026 | 21:38
Ովքեր են ղեկավարում Սյունիքի համայնքները․ քաղաքական անցյալ, բիզնես կապեր և քրեական վարույթներ
Պուտինի ձերբակալման օրդերը տված դատավորը գլխավորել է Հաագայի դատարանը
Քաղաքականություն
12.03.2024 | 11:55
Միջազգային քրեական դատարանի նախագահ է դարձել ճապոնացի դատավոր Տոմոկո Ականեն, որը մեկ տարի առաջ Ռուսաստանի նախագահ Վլադիմիր Պուտինի ձերբակալման օրդերն էր տվել։ Այս մասին հաղորդվում է կազմակերպության կայքում հրապարակված հաղորդագրությունում։
Ականեն ընտրվել է մարտի 11-ին դատարանի անդամների քվեարկությամբ՝ երեք տարի ժամկետով։ Ականեի հետ ընտրվել են նաև նրա տեղակալները՝ իտալացի Ռոզարիո Այտալան և Բենինից Ռեյն Ալապինի-Գանսուն։
ՄՔԴ նախագահը և նրա տեղակալները կազմում են Նախագահությունը, որը, ըստ դատարանի հաղորդագրության, «առանցքային դեր է խաղում դատարանին որպես ամբողջություն ռազմավարական ուղղություն ապահովելու գործում»: Նախագահությունը պատասխանատու է նաև դատարանի անմիջական աշխատանքի համար։
Հավելենք, որ Ականեն և Այտալան եղել են ՄՔԴ երեք դատավորներից, որոնք 2023 թվականի մարտին ստորագրել են ՌԴ նախագահ Վլադիմիր Պուտինի և երեխաների հարցով օմբուդսմեն Մարիա Լվովա-Բելովայի դեմ ձերբակալության օրդերը՝ Ուկրաինայի օկուպացված տարածքներից երեխաներին ապօրինաբար Ռուսաստան արտաքսելու մեղադրանքով:
Ռուսաստանում գործ է հարուցվել Ականեի և Այտալայի նկատմամբ՝ ապօրինի կալանավորում (Քրեական օրենսգրքի 301-րդ հոդվածի 2-րդ մաս) և օտարերկրյա պետության ներկայացուցչի վրա հարձակում նախապատրաստելու (Քրեական օրենսգրքի 30-րդ հոդվածի 1-ին մաս, Քրեական օրենսգրքի 360-րդ հոդվածի 2-րդ մասով) հոդվածներով: ՌԴ ՆԳՆ-ն դատավորների նկատմամբ հետախուզում է հայտարարել։
