ՌԴ ԱԴԾ-ն հայտնել է Կարելիայում «ահաբեկչություն կանխելու» մասին

Ռուսաստանի անվտանգության ուժերը Կարելիայի Օլոնեցկի շրջանում սպանել են Բելառուսից ակտիվիստ 49-ամյա Նիկոլայ Ալեքսեևին։ Այս մասին սեփական աղբյուրներին հղումով գրում է Astra-ն։ Ավելի ուշ ՏԱՍՍ-ը, հղում անելով ԱԴԾ-ին, հայտնել է, որ անվտանգության ուժերը կանխել են «ահաբեկչության նախապատրաստումը Կարելիայի վարչական շենքերից մեկում. Բելառուսի քաղաքացին, որն ուկրաինական հատուկ ծառայությունների հրահանգով ահաբեկչություն էր նախապատրաստում, վնասազերծվել է ձերբակալման փորձի ժամանակ», գրում է Current Time։

Ըստ ռուսական հետաքննության՝ Ալեքսեևը, իբր, դիմադրություն է ցույց տվել ձերբակալության ժամանակ և սպանվել է ԱԴԾ-ի աշխատակիցների կողմից: Անվտանգության ուժերը տղամարդուն փորձել են բերման ենթարկել «ահաբեկչական հարձակում նախապատրաստելու» հոդվածով (ՌԴ Քրեական օրենսգրքի 30-րդ հոդվածի 1-ին մաս, 205-րդ հոդվածի 1-ին մաս) նրա դեմ հարուցված գործի շրջանակում։

Քննիչների տվյալներով՝ Ալեքսեևը, իբր, մտադիր էր պայթեցնել Օլոնեց քաղաքի վարչական շենքը։ ԱԴԾ-ն պաշտոնապես չի հայտնել նրա մահվան մասին։

Նշվում է, որ Ալեքսեևը եղել է «Կաստուս Կալինովսկի» գնդի անդամ, որը մարտնչել է Ուկրաինայի կողմից և արգելված է Բելառուսում։ Նա գտնվում էր միջպետական հետախուզման մեջ։

Ալեքսեևը 2020 թվականի բողոքի ցույցերի մասնակից է։ Նա ընդդիմանում էր Ալեքսանդր Լուկաշենկոյի ռեժիմին և քննադատում այն, այդ թվում՝ սոցիալական ցանցերում։ Թե ինչ հանգամանքներում է նա հայտնվել Ռուսաստանում, հայտնի չէ։

Ռուսաստանում 2023 թվականին առնվազն 50 մարդ է մահացել նախնական կալանավայրերում, հատուկ կալանավայրերում, դատարաններում, ոստիկանական բաժանմունքներում և ոստիկանական մեքենաներում, գրում է «Վյորստկան», որը վերլուծում է պետական գերատեսչությունների և լրատվամիջոցների հաղորդումները։ Նրանց մեծ մասը մահացել է նախնական կալանքի տակ՝ 22 մարդ։ Եվս 14 մարդ մահացել է ոստիկանական բաժանմունքներում, 5-ը՝ ձերբակալվելիս, 4-ը՝ ոստիկանական մեքենաներում, 2-ը՝ հատուկ կալանավայրերում, ևս 1-ը՝ դատարանում։