Քաղաքականություն
06.03.2024 | 18:11
ՄԱԿ-ում ԱՄՆ նախկին դեսպան, Հարավային Կարոլինայի նախկին նահանգապետ Նիկի Հեյլին ավարտելու է նախագահական քարոզարշավը «Սուպեր երեքշաբթիի» փրայմերիզում մեծ պարտություններից հետո՝ փաստացիորեն զիջելով Հանրապետական կուսակցությունում իր մրցակցին՝ նախկին նախագահ Դոնալդ Թրամփին, գրում է The New York Times-ը։
Հեյլիի ծրագրերին ծանոթ աղբյուրները հայտնել են, որ նա կհայտարարի մրցավազքից դուրս գալու մասին Հարավային Կարոլինա նահանգի Չարլսթոն քաղաքում ելույթի ժամանակ: Եվս երեք աղբյուրներ ասել են, որ նա չի սատարի Թրամփին։
Ըստ պարբերականի զրուցակիցների՝ իր ելույթում Հեյլին նախատեսում է ասել, որ Թրամփի պարտականությունն է գրավել իրեն աջակցած ընտրողներին։
Նշենք, որ «սուպեր երեքշաբթիի» ժամանակ 15 նահանգներում անցկացված փրայմերիզում Հեյլին հաղթել է միայն Վերմոնտում։
