Բայդենն ու Թրամփը ընդհուպ մոտեցել են իրենց կուսակցությունների կողմից առաջադրումն ապահովելուն

ԱՄՆ նախագահ Ջո Բայդենն ու նախկին նախագահ Դոնալդ Թրամփն ընդհուպ մոտեցել են այն բանին, որպեսզի ապահովեն իրենց առաջադրումն իրենց կուսակցությունների կողմից՝ «սուպեր երեքշաբթիի» շրջանակում միանգամից մի քանի հաղթանակ տոնելով, գրում է VOA-ն։

Քվեարկության արդյունքները թեկնածուներին մոտեցրել են 2020 թվականի իրենց դիմակայության պատմական կրկնությանը: «Սուպեր երեքշաբթիի» արդյունքը կարող է մեծացնել ճնշումը Թրամփի վերջին լուրջ մրցակից Նիկի Հեյլիի վրա, որպեսզի նա դադարեցնի նախընտրական արշավը:

«Սուպեր երեքշաբթի» օրը քվեարկությունը տեղի է ունեցել 15 նահանգներում՝ Ալյասկայից և Կալիֆորնիայից մինչև Վերմոնտ և Վիրջինիա, ինչպես մեկ ամերիկյան կղզի-տարածքում: Բաշխվում էին կուսակցական համագումարների հարյուրավոր պատվիրակների ձայները՝ ամենամեծ «ավարը» երկու կուսակցությունների համար:

Ե՛վ Բայդենը, և՛ Թրամփը հաղթել են Ալաբամա, Արքանզաս, Մեյն, Մինեսոտա, Հյուսիսային Կարոլինա, Կալիֆորնիա, Օկլահոմա, Կոլորադո, Թեխաս, Թենեսի և Վիրջինիա նահանգներում:

81-ամյա Բայդենը և 77-ամյա Թրամփը շարունակում են գերիշխել իրենց կուսակցություններում, չնայած երկուսն էլ բախվում են իրենց տարիքի հետ կապված հարցերի: Այնուամենայնիվ, նրանցից և ոչ մեկը լայն ժողովրդականություն չի վայելում ընտրողների շրջանում:

Թրամփը կարող է ապահովել համագումարի անհրաժեշտ թվով պատվիրակներ և դառնալ հանրապետականների ենթադրյալ թեկնածուն արդեն մարտի 12-ին։ Բայդենի համար դա կարող է տեղի ունենալ մարտի 19-ին։