14.12.2025 | 21:40
Ոստիկանությունը ձերբակալել է Բրաունի համալսարանում կրակ բացելու մեջ կասկածվողին
Ֆիդանն ԱՄՆ-ում հանդիպումներում քննարկելու է նաև Հայաստան-Ադրբեջան կարգավորման գործընթացը
Քաղաքականություն
05.03.2024 | 20:25
Թուրքիայի ԱԳ նախարար Հաքան Ֆիդանն ԱՄՆ պետքարտուղար Էնթոնի Բլինքենի հրավերով մարտի 7-8-ը պաշտոնական այցով կմեկնի Վաշինգտոն, հայտնում են թուրքական լրատվամիջոցները՝ վկայակոչելով դիվանագիտական աղբյուրներին։
Ֆիդանի այցի ընթացքում Թուրքիա-ԱՄՆ Ռազմավարական մեխանիզմի 7-րդ հանդիպման շրջանակում կողմերը մանրամասն կքննարկեն երկկողմ համագործակցության հարցերի լայն շրջանակ՝ համապատասխան կառույցների ներկայացուցիչների մասնակցությամբ։
Այցի ընթացքում Ֆիդանը հանդիպելու է նաև ԱՄՆ Սենատի անդամների, ԱՄՆ նախագահ Ջո Բայդենի ազգային անվտանգության հարցերով խորհրդական Ջեյք Սալիվանի հեն։
Հաղորդվում է, որ երկկողմ օրակարգային հարցերից զատ՝ քննարկվելու են նաև միջազգային թեմաներ։ Մասնավորապես, հանդիպումների ընթացքում համակողմանիորեն քննարկվելու են տարածաշրջանային հարցեր, ինչպիսիք են Հունաստանի, Կիպրոսի հետ դրական հարաբերությունները, Արևելյան Միջերկրական ծովի հարցը, Ադրբեջանի և Հայաստանի, Սիրիայի, Եմենի, Իրանի և Լիբիայի միջև խաղաղության գործընթացը, ռուս-ուկրաինական պատերազմը։
Հիշեցնենք՝ Ֆիդանն Անթալիայի դիվանագիտական ֆորումի ընթացքում հայտնել էր, որ պետքարտուղար Էնթոնի Բլինքենի հրավերով այս շաբաթ մեկնում է ԱՄՆ՝ մասնակցելու երկու երկրների ռազմավարական մեխանիզմի խորհրդի նիստին։
Այցով ԱՄՆ-ում է նաև Թուրքիայի Ազգային հետախուզական ծառայության (MİT) ղեկավար Իբրահիմ Քալընը։
Էմմա Չոբանյան
