ՌԴ Գերագույն դատարանը վերջնականապես մերժել է Բորիս Նադեժդինին նախագահի թեկնածու գրանցել

Բորիս Նադեժդինին որպես ՌԴ նախագահական ընտրությունների թեկնածու գրանցումը մերժելու մասին որոշումն ուժի մեջ է մտել։ Այս մասին հայտնել է ՌԻԱ Նովոստին՝ վկայակոչելով ՌԴ Գերագույն դատարանի վերաքննիչ ատյանի որոշմանը, գրում է Meduza-ն։

Գերագույն դատարանը փետրվարի 21-ին մերժել էր բավարարել Նադեժդինի հայցը, որը պահանջում էր անօրինական ճանաչել Ռուսաստանի Կենտրոնական ընտրական հանձնաժողովի մերժումը նրան թեկնածու գրանցելու մասին։ Այնուհետև քաղաքական գործիչը բողոք էր ներկայացրել, որը Վերաքննիչ դատարանը քննարկել է մարտի 4-ին։

«Առաջին ատյանի դատարանի որոշումը թողնվել է անփոփոխ, իսկ վերաքննիչ բողոքը մերժվել է»,- փոխանցել է Նադեժդինը վերաքննիչ դատարանի որոշումը։

Նադեժդինն առաջադրվել է «Քաղաքացիական նախաձեռնություն» կուսակցության կողմից։ Առաջադրվելու համար ստորագրահավաքի առաջին երեք շաբաթվա ընթացքում նրա կողմնակիցներին հաջողվել էր հավաքել 25 հազար ստորագրություն։ Այն բանից հետո, երբ Նադեժդինին սկսեցին աջակցել հայտնի ընդդիմադիր քաղաքական գործիչներ, հավաքված ստորագրությունների թիվը սկսեց կտրուկ աճել, հավաքագրման կետերում հերթեր առաջացան, և հաջորդ 75 հազարը հավաքվեց ընդամենը հինգ օրում։

Նադեժդինը ՌԴ նախագահի միակ թեկնածուն է, որն ուղղակիորեն դեմ է արտահայտվել Ուկրաինայում պատերազմին։ Նա ռազմական գործողություններ սկսելու որոշումն անվանել է «ճակատագրական սխալ», նաև ասել, որ ՌԴ նախագահ Վլադիմիր Պուտինը երկիրը տանում է «դեպի աղետ»։

Հավելենք, որ ՌԴ նախագահական ընտրությունները տեղի են ունենալու մարտի 15-17-ը։