Ալիևը հայտարարել է, թե ԵԽԽՎ-ն Ադրբեջանի դեմ «կողմնակալ ու կեղտոտ արշավ է տանում»

Ադրբեջանի նախագահ Իլհամ Ալիևը Բաքվում Բուլղարիայի Ազգային ժողովի նախագահ Ռոսեն Դիմիտրովի հետ հանդիպմանը հերթական անգամ դժգոհել ԵԽԽՎ-ից։ Ադրբեջանական լրատվամիջոցների փոխանցմամբ՝ նա ասել է, թե Ադրբեջանը, իբր, «լիովին վերականգնել է իր տարածքային ամբողջականությունն ու ինքնիշխանությունը՝ միջազգային իրավունքի սկզբունքներին համապատասխան»։ Ալիևը նշել է, որ դրանից հետո Ադրբեջանի դեմ լայնածավալ արշավ է ծավալվել մի շարք եվրոպական կառույցների կողմից։

Նա հայտարարել է, թե Եվրախորհրդի Խորհրդարանական վեհաժողովում «Ադրբեջանի դեմ կողմնակալ և կեղտոտ արշավ է տարվում»՝ հավելելով, որ նման մոտեցումն անհանդուրժելի է ադրբեջանական պատվիրակության համար։ Ալիևն ասել է, որ մի շարք երկրների խորհրդարաններ իրենց դիրքորոշումն են հայտնել այս «անարդարության դեմ»։

Ադրբեջանի նախագահը նաև Հայաստանի հասցեին հերթական մեղադրանքներն է հնչեցրել՝ հայտարարելով, թե Արցախյան 44-օրյա պատերազմից հետո, իբր, «Հայաստանը դրական վերաբերմունք չի ցուցաբերել խաղաղությանը նպաստելու՝ Ադրբեջանի նախաձեռնություններին, այլ հակառակը, վարել է Ղարաբաղում սպառազինության և ռազմականացման քաղաքականություն»։

Նշենք, որ օրերս Ալիևը Գերմանիայի տնտեսության արևելյան կոմիտեի նախագահ Մայքլ Հարմսի գլխավորած պատվիրակության հետ հանդիպմանն էր ԵԽԽՎ-ից բողոքել՝ նշելով, որ եթե մեկ տարվա ընթացքում Ադրբեջանի պատվիրակության իրավունքները չվերականգնվեն, «Բաքուն կարող է լրջորեն քննարկել Եվրախորհրդից ամբողջական դուրս գալու հարցը»։

Հիշեցնենք՝ հունվարի 24-ին ԵԽԽՎ-ն քվեարկությամբ որոշել է չվավերացնել Ադրբեջանի պատվիրակության լիազորությունները։ Այս որոշմամբ Ադրբեջանի պատվիրակությունն առնվազն մեկ տարով հեռացվել է ԵԽԽՎ-ից և կարող է վերադառնալ իր կանոնադրական պարտավորությունները կատարելու դեպքում։ Ադրբեջանական պատվիրակության նկատմամբ քաղաքական պատժամիջոցներ սահմանող որոշմանը կողմ էր քվեարկել 76, դեմ՝ 10 պատգամավոր, ևս 4 խորհրդարանական ձեռնպահ էր մնացել։ Դեմ են քվեարկել Թուրքիայի պատվիրակությունից 9 պատգամավոր, ևս մեկ պատգամավոր՝ Ալբանիայից։

Էմմա Չոբանյան