Հայիթիում բանտի վրա հարձակումից և հազարավոր բանտարկյալների փախուստից հետո արտակարգ դրություն է հայտարարվել

Հայիթիի կառավարությունը պարետային ժամ է սահմանել և արտակարգ դրություն հայտարարել այն բանից հետո, երբ զինված խմբավորումները ներխուժել են երկրի երկու ամենամեծ բանտերը, ինչից հետո հազարավոր բանտարկյալներ փախուստի են դիմել, գրում է Associated Press-ը։

Արտակարգ դրությունն ուժի մեջ է մտել անմիջապես՝ 72 ժամով։ Ժամը 20:00-ից մինչև 5:00-ն արգելվելու է փողոցում գտնվել՝ բացի ոստիկաններից, հրշեջներից, բժիշկներից և լրագրողներից:

Իշխանությունները խոստացել են փնտրել փախուստի դիմած բանտարկյալներին։

«Ոստիկանությանը հրամայվել է օգտագործել իրենց տրամադրության տակ եղած բոլոր օրինական միջոցները՝ պարետային ժամին հետևելու և բոլոր իրավախախտներին ձերբակալելու համար»,- ասել է վարչապետի պաշտոնակատար, ֆինանսների նախարար Պատրիկ Բոյվերը:

Անցյալ շաբաթվա կեսերից ի վեր Հայիթիում բռնությունը շարունակում է աճել, առնվազն ինը մարդ է սպանվել հինգշաբթի օրվանից, որոնցից չորսը ոստիկաններ են: Բանդաների դաշինքի առաջնորդ Ջիմի Շերիզիեն, որը նախկին ոստիկան է՝ «Բարբեքյու» մականունով, կոչ է արել հանցավոր խմբավորումներին միավորվել և տապալել վարչապետ Արիել Հենրիի իշխանությունը:

Բանդաները համակարգված հարձակումներ են իրականացնում Հայիթիի մայրաքաղաք Պորտ-օ-Պրենսի կառավարական հաստատությունների՝ Կենտրոնական բանկի, ոստիկանական բաժանմունքների, միջազգային օդանավակայանի, ֆուտբոլի ազգային մարզադաշտի և խոշոր բանտերի վրա:

Հայիթիի ազգային բանտում 3,687 բանտարկյալ է եղել, ՄԱԿ-ի գնահատմամբ՝ գրեթե բոլորը փախել են՝ 3,5 հազար մարդ։ Ընդամենը մի քանի տասնյակ մարդ է նախընտրել մնալ այնտեղ, այդ թվում՝ 18 նախկին կոլումբիացի զինվորներ, որոնք մեղադրվել են վարձկաններ լինելու մեջ՝ 2021 թվականին Հաիթիի նախագահ Յովենել Մոիսեի սպանության ժամանակ։ Նրանք տարհանվել են։