24.06.2026 | 23:56
Հրդեհ Վարդաշեն 6-րդ փողոցի շենքերից մեկում. մեկ անձ դիմել է բուժօգնության, տարհանվել է 12 քաղաքացի
Սամվել Շահրամանյանի թիկնապահը բերման է ենթարկվել և ձերբակալվել ապօրինի թմրամիջոց պահելու, օգտագործելու և իրացնելու կասկածանքով
Հասարակություն
21.02.2024 | 11:37
Factor․am-ի տեղեկություններով՝ երեկ ոստիկանության ծառայողներն ապօրինի թմրամիջոց պահելու, օգտագործելու և իրացնելու կասկածանքով բերման են ենթարկել Արցախի նախագահ Սամվել Շահրամանյանի թիկնազորի անդամներից մեկին։ Քննչական կոմիտեն, առանց անձնավորելու և քաղաքացու տվյալները նշելու, հաստատեց տեղեկությունը։
«Ոստիկանության բաժին տարված քաղաքացու վերաբերյալ հաղորդում և համապատասխան փաստաթղթեր են ներկայացվել Քննչական կոմիտե, ավելի ուշ ՔԿ է ներկայացվել նաև տվյալ անձը։ Դեպքի առթիվ նախաձեռնվել է քրեական վարույթ, Քրեական օրենսգրքի 393-րդ հոդվածի 1-ին մասի և 396-րդ հոդվածի 1-ին մասի հատկանիշներով, իրականացվում է նախաքննություն։ Անձը ձերբակալվել է»,- Factor.am-ի հետ զրույցում ասաց ՔԿ մամուլի քարտուղար Գոռ Աբրահամյանը։
Հիշեցնենք՝ երեկ «Եռաբլուր» զինվորական պանթեոնում միջադեպ էր տեղի ունեցել նշված անձի և 24news լրատվական ծառայության լրագրողի և օպերատորի միջև։ Թիկնապահը խոչընդոտել էր լրատվամիջոցի աշխատանքը և հայհոյել նրանց։
Ավելի ուշ, Արցախի տեղեկատվական շտաբը հայտարարություն էր տարածել՝ նշելով, որ Սամվել Շահրամանյանն ընդունել է լրատվամիջոցի ներկայացուցիչներին և դատապարտել կատարվածը։
