17.12.2025 | 21:49
Լավրովն ու Արաղչին քննարկել են Հյուսիս-Հարավի համար ռազմավարական Ռեշտ-Աստարա երկաթուղու շինարարությունը
ԵՄ-ն կոչ է անում անհապաղ դադարեցնել կրակը Գազայի հատվածում
Քաղաքականություն
20.02.2024 | 13:28
Գազայի հատվածում, որտեղ Իսրայելը պատերազմ է մղում ՀԱՄԱՍ-ի դեմ, մարդասիրական նկատառումներով պետք է անհապաղ հրադադար հաստատվի։ Այս դադարը պետք է հանգեցնի ռազմական գործողությունների երկարաժամկետ դադարեցման, բոլոր իսրայելցի պատանդների անվերապահ ազատ արձակման և խաղաղ բնակիչներին մարդասիրական օգնության տրամադրման: Նման հայտարարությամբ են հանդես եկել ԵՄ 26 երկրները Բրյուսելում ԱԳ նախարարների հանդիպման արդյունքներով, գրում է DW-ի ռուսական ծառայությունը։
«Մենք ընդգծում ենք, թե որքան կարևոր է մշտապես ապահովել խաղաղ բնակչության պաշտպանությունը՝ համաձայն միջազգային մարդասիրական իրավունքի»,- ասվում է ԵՄ անդամ 26 երկրների արտգործնախարարների հայտարարության մեջ։
Փաստաթուղթը նաև կոչ է անում Իսրայելին ռազմական գործողություններ չիրականացնել Գազայի հատվածի հարավում գտնվող Ռաֆահ քաղաքում, որն ավելի կսրի ներկայիս աղետալի իրավիճակը և կխանգարի շտապ անհրաժեշտ մարդասիրական օգնության մատակարարմանը։
Ըստ dpa գործակալության՝ ներկայում Ռաֆահ քաղաքում շուրջ մեկ միլիոն խաղաղ բնակիչ կա։ Նրանց մեծ մասը փախստականներ են, որոնք ժամանել են Գազայի հատվածի այլ շրջաններից։
ԵՄ միակ երկիրը, որը չի միացել արտգործնախարարների համատեղ հայտարարությանը, Հունգարիան է, գրում է dpa-ն՝ վկայակոչելով դիվանագիտական աղբյուրների։ Նշվում է, որ Եվրամիությունում այս երկիրը համարվում է հատկապես բարեկամական տրամադրված Իսրայելի նկատմամբ։
Ավելի վաղ՝ հունվարի 26-ին, Արդարադատության միջազգային դատարանը հրապարակել էր Իսրայելի դեմ Հարավաֆրիկյան Հանրապետության (ՀԱՀ) հայցով կանխարգելիչ միջոցների մասին որոշումը։ Հաագայի դատարանն Իսրայելին պարտավորեցրել է զերծ մնալ ցանկացած գործողությունից, որը կարող է ներառվել Ցեղասպանության հանցագործության կանխարգելման և պատժի մասին ՄԱԿ-ի կոնվենցիայում, և երաշխավորել, որ Իսրայելի պաշտպանության ուժերը (IDF) ցեղասպանություն չգործեն Գազայում։
