15.12.2025 | 23:44
Ադրբեջանը պետք է դադարեցնի անձանց հսկողության MIRAS համակարգի ներդրումը. HRW
Ստամբուլի քաղաքապետի Էրդողանի թեկնածուն այցելել է Պոլսո Հայոց պատրիարքարան
Քաղաքականություն
09.02.2024 | 18:26
Թուրքիայի նախագահ Ռեջեփ Թայիփ Էրդողանի գլխավորած «Արդարություն և զարգացում» կուսակցությունից Ստամբուլի քաղաքապետի թեկնածու Մուրադ Քուրումն այցելել է Պոլսի Հայոց պատրիարքարան, հանդիպել պատրիարք Սահակ Մաշալյանին։ Այս մասին X-ում հայտնել է «Արդարություն և զարգացում» կուսակցությունից Թուրքիայի Ազգային ժողովի հայազգի պատգամավոր Սևան Սըվաջըօղլուն։
Նա նշել է, որ հանդիպում են անցկացրել Թուրքիայում բնակվող փոքրամասնությունների հետ։
«Շնորհակալություն եմ հայտնում Հայոց պատրիարք Սահակ Մաշալյանին, Ստամբուլի մեր պատգամավորներին, մեր թաղապետերին ու թաղապետերի թեկնածուներին, Թուրքիայում մեր փոքրամասնությունների համայնքների հիմնադրամի նախագահներին ու ներկայացուցիչներին, ինչպես նաև մեր բոլոր նրանց, ովքեր ներկա էին»,- գրել է Սըվաջըօղլուն՝ նշելով, որ ընտրություններում հաղթողը լինելու են Ստամբուլն ու նրա բնակիչները։
Նշենք, որ Քուրումը Թուրքիայի շրջակա միջավայրի, քաղաքաշինության և կլիմայի փոփոխության հարցերով նախկին նախարարն է։ Էրդողանն առաջադրել է նրա թեկնածությունը՝ հաղթելու Ստամբուլի գործող քաղաքապետ, ընդդիմադիր Ժողովրդահանրապետական կուսակցության անդամ Էքրեմ Իմամօղլուին։
Տարբեր հարցումների համաձայն, սակայն, Իմամօղլուն գերազանցում է Քուրումին։
Էմմա Չոբանյան
