Դպրոց կառուցելու փող կա, կառուցող չկա․ հայտարարված մրցույթների կեսում հաղթող չի եղել. ՏԵՍԱՆՅՈՒԹ

Դպրոցաշինության հայտարարված մրցույթների կեսում դեռ հաղթող կազմակերպություն չկա։ Այս խնդրի մասին լրագրողների հետ հանդիպմանը երեկ խոսեց ֆինանսների նախարար Վահե Հովհաննիսյանը։

Իշխող ուժը 300 դպրոց, 400 մանկապարտեզ է խոստացել կառուցել, հիմնանորոգել ու վերակառուցել մինչև 2026 թվականը, ու թեև դրանց մի մասի շինարարությունն ընթացքի մեջ է, վարչապետը դժգոհությունը չի թաքցնում։

«Էն ժամանակ մեզ թվում էր` փողը լինի, մնացած բոլոր հարցերը կլուծենք, էդպես չի, մենք հիմա փողը ունենք, չենք կարողանում մեզ անհրաժեշտ մակարդակով դպրոց կառուցել և, ընդհանրապես, որևէ բան կառուցել»,- նշում է վարչապետը:

Կառավարության նախորդ նիստին Փաշինյանը հարցին անդրադառնալիս կատակեց. «Հիմա էլ փողը ունենք, բայց բախտ չունենք՝ ինչպես ասում են»։

Ֆինանսների նախարարը գործադիրի ղեկավարի հետ այս հարցում այնքան էլ համաձայն չէ։ Նրա խոսքով՝ մենք բախտ էլ ունենք, բայց այստեղ կարողությունների հարց է։ Պատճառն այն է, որ կա՛մ գները բարձր են տալիս, կա՛մ մեր շինարարական ընկերությունները չունեն բավարար կարողություններ, որպեսզի այդ ծավալի աշխատանքներ սկսեն։

Գործատուների միության ղեկավար Գագիկ Մակարյանը, բացի բախտից, փողից ու կարողությունների սահմանափակ լինելուց, այստեղ մի շարք այլ  խնդիրներ է տեսնում, որոնցից մեկը պետական գնումների համակարգն է։ Նրա խոսքով՝ օրենքի վերջին փոփոխություններով կանոնները շատ են խստացվել, և ռիսկերի հարցում պետության պատասխանատվությունը մոտեցրել են 0-ի։

Մանրամասները` տեսանյութում:

Անժելա Պողոսյան