Ֆրանսիացի ֆերմերներն ամբողջությամբ «կպաշարեն» մայրաքաղաք Փարիզը

Ֆրանսիայի կառավարության քաղաքականությունից դժգոհ ֆերմերները պատրաստվում են արգելափակել Փարիզը, գրում է Figaro-ն։

«Ֆրանսիայի մայրաքաղաքը երկուշաբթի ժամը 14:00-ից կարգելափակվի այն բանից հետո, երբ մի քանի արհմիություններ կոչ արեցին «պաշարել» քաղաքը»,- ասվում է հոդվածում:

Ֆրանսիայի գյուղատնտեսական արհմիությունների ազգային ֆեդերացիան (FNSEA) և Jeunes Agriculteurs արհմիությունը նախատեսում են փակել քաղաք տանող յոթ մայրուղիները: Ակցիան կտևի առնվազն հինգ օր։

Jeunes Agriculteurs-ի գլխավոր քարտուղարի տեղակալը հայտարարել է, որ Փարիզի շրջակայքում արգելափակման վայրերում կտեղակայվի 1500-ից 2500 տրակտոր։ Երկու կազմակերպություններն էլ մտադիր են ամբողջությամբ արգելափակել Փարիզը, որպեսզի թույլ չտան դեպի մայրաքաղաք ցանկացած ապրանքների մուտքը։ Նրանք ծրագրում են նաև Փարիզի երկու գլխավոր օդանավակայանների՝ Շառլ դե Գոլի ու Օռլիի, ինչպես նաև քաղաքից հարավ գտնվող Եվրոպայի ամենախոշոր՝ Ռյունժի մթերային շուկայի «պաշարում»։

Ակտիվիստները վարչապետ Գաբրիել Ատալի առաջարկած միջոցառումները համարել են անբավարար և ոչ համաչափ ֆերմերների բողոքի մասշտաբին։

Սրան ի պատասխան՝ ՆԳՆ-ն, որը նախկինում հայտարարել էր, թե չի ցրելու մայրուղիները փակող և պրեֆեկտուրաները գոմաղբով ողողող ֆերմերներին, քանի որ նրանք օրինական կերպով իրենց պահանջներն են արտահայտում, մի ամբողջ պաշտպանության գիծ է կառուցել։

Ֆրանսիայի մայրաքաղաքի Իլ-դե-Ֆրանս շրջանում ավելի քան 15 հազար ոստիկան է տեղակայվել։ Ֆրանսիական ժանդարմերիան զրահամեքենաներ է քշել դեպի շուկա, որը բողոքի դուրս եկած ֆերմերները մտադիր են արգելափակել։
Վարչապետը, որը ընդամենը երկուսուկես շաբաթ է, ինչ պաշտոնավարում է, ուրբաթ երեկոյան հայտարարություններ է տարածել՝ ցանկանալով հանգստացնել ֆերմերներին և դադարեցնել բողոքի ակցիաները։ Դրանք, ըստ ամենայնի, արդյունք չեն ունեցել։