Թուրքիան ցանկանում է գազային հանգույցով Թուրքմենստանից էնեգերտիկ ռեսուրսներն արևմտյան շուկաներ մատակարարել

Թուրքմենստանում Թուրքիայի դեսպան Ահմեթ Դեմիրոքը Աշխաբադում հրավիրված ասուլիսում ներկայացրել է թուրքմենա-թուրքական հարաբերությունների վերջին զարգացումները։ Նա, մասնավորապես, խոսել է էներգետիկ ոլորտում համագործակցության ու Անկարայի ծրագրերի մասին, այն է՝ Ռուսաստանի հետ ստեղծվող գազային հանգույցով  դիվեսիֆիկացնել թուրքմենական գազի մատակարարումները, գրում է News Central Asia-ն։

«Ոչ վաղ անցյալում մեր ապրած համաճարակը և տարածաշրջանում տեղի ունեցող աշխարհաքաղաքական իրադարձությունները ևս մեկ անգամ ցույց տվեցին էներգետիկ անվտանգության և ռեսուրսների դիվերսիֆիկացման կարևորությունն ամբողջ աշխարհի, հատկապես՝ Եվրոպայի համար։ Թուրքիան կարևոր քայլեր է ձեռնարկում գազային հանգույց դառնալու ուղղությամբ։ Ըստ էության, Թուրքիայի այս ջանքերը նպաստում են կայունության պահպանմանը մեր մերձակա աշխարհագրությունում, մասնավորապես, Եվրոպայում»,- ասել է թուրք դեսպանը։

Ներկայում Թուրքիան Կասպյան գազը Եվրոպա է տեղափոխում Անդրանատոլիական գազատարով (TANAP):

«Թուրքմենստանը կարևոր դիրք է զբաղեցնում ոչ միայն բնական գազի արտահանման, այլ նաև էլեկտրաէներգիայի ոլորտում՝ շնորհիվ իր գործող և կառուցվող էներգափոխանակման կայանների։ Հուսով ենք, որ շուտով կսկսվեն թուրքմենական բնական գազի և էլեկտրաէներգիայի արևմտյան շուկաներ տեղափոխելու աշխատանքները»,- նշել է Ահմեթ Դեմիրոքը։

Հիշեցնենք՝ 2022 թվականի հոկտեմբերին Ռուսաստանի նախագահ Վլադիմիր Պուտինը Թուրքիայի ղեկավար Ռեջեփ Թայիփ Էրդողանին առաջարկել էր երկրում գազային հանգույց ստեղծել։ Թուրքիայի և ՌԴ-ի նախագահները հանձնարարել էին շտապ մշակել Թուրքիայում գազային հանգույցի ստեղծման նախագիծ, որով Ռուսաստանը կարող է գազի տարանցումը Հյուսիսային հոսքերից տեղափոխել դեպի սևծովյան տարածաշրջան և Թուրքիա։ Էրդողանը նաև ասել էր, որ Եվրոպան կարող է ռուսական գազ ստանալ Թուրքիայի տարածքով։ Ավելի ուշ տեղեկություններ տարածվեցին, որ Թուրքիան և ռուսական «Գազպրոմ» ընկերությունը պայմանավորվել են առաջիկայում կազմել գազային հանգույցի ճանապարհային քարտեզն ու սկսել նախագծի իրականացման աշխատանքները։

Էմմա Չոբանյան