Քաղաքականություն
24.01.2024 | 16:44
ԱՄՆ-ն այժմ փող չունի Ուկրաինայի համար, ուստի Պենտագոնը չի կարող Կիև ուղարկել այն զինամթերքն ու հրթիռները, որոնք անհրաժեշտ են ուկրաինական զորքերին ռուսական ագրեսիային հակազդելու համար, գրում է ABC News-ը։
Նախագահ Բայդենի վարչակազմը երեքշաբթի առաջին անգամ դատարկաձեռն է եկել մոտ 50 երկրների ամենամսյա հանդիպմանը, որոնք համակարգում են Ուկրաինային աջակցությունը, նշում է պարբերականը։ Խումբը ստեղծվել է ԱՄՆ պաշտպանության նախարար Լլոյդ Օսթինի կողմից 2022 թվականի ապրիլին։
Մինչև Կոնգրեսի կողմից Ուկրաինայի համար լրացուցիչ միջոցների հաստատումը՝ Վաշինգտոնը Կիևին զենք մատակարարելու հարցում հույսը դնում է իր դաշնակիցների վրա:
«Ես կոչ եմ անում այս խմբին աշխատել այն ուղղությամբ, որպեսզի Ուկրաինային ավելի շատ կենսական նշանակության ցամաքային հակաօդային պաշտպանության համակարգեր և հրթիռներ մատակարարվեն»,- ասել է հանդիպմանը շագանակագեղձի քաղցկեղի վիրահատությունից հետո տանն ապաքինվելու ընթացքում տեսակապով միացած Օսթինը։
Ուկրաինական զորքերը ռազմաճակատում զինամթերքի սուր պակաս են զգում, ինչը քննարկվել է Լլոյդ Օսթինի մասնակցությամբ հանդիպման ժամանակ։
«Դա պատճառներից մեկն է, որ մենք կենտրոնացել ենք Կոնգրեսի հարցերին պատասխանելու անհրաժեշտության վրա, որպեսզի նրանք կարողանան առաջ շարժվել օգնության օրինագծի հարցում»,- հանդիպումից հետո ասել է պաշտպանության նախարարի միջազգային հարցերով օգնական Սելեստա Վոլանդերը:
Մինչ այդ, եվրոպացի դաշնակիցները նոր միջոցներ են ձեռնարկում Ուկրաինային աջակցելու համար։
ՆԱՏՕ-ի գլխավոր քարտուղար Յենս Ստոլտենբերգը Բրյուսելում հայտարարել է 1,2 միլիարդ դոլար արժողությամբ համատեղ պայմանագրի կնքման մասին՝ ավելի քան 222 հազար 155 մմ ռազմամթերք գնելու համար։ Այս ռազմամթերքն ամենաշատն օգտագործվողն է պատերազմում, և պայմանագիրը կօգնի համալրել դաշնակիցների պաշարները, որոնք իրենց իսկ պահուստներից Կիևին զինամթերք են տրամադրել։
