15.12.2025 | 23:30
Պինոչետի բռնապետությունից ի վեր առաջին անգամ Չիլիի նախագահական ընտրություններում ծայրահեղ աջերի թեկնածուն հաղթել է
Իրանի նախագահը վաղը կմեկնի Թուրքիա
Քաղաքականություն
23.01.2024 | 17:18
Իրանի նախագահ Էբրահիմ Ռաիսին չորեքշաբթի կայցելի Անկարա՝ թուրք գործընկեր Ռեջեփ Թայիփ Էրդողանի հրավերով, հայտնում է IRNA գործակալությունը։
Նշվում է, որ Ռաիսին Թուրքիա է այցելելու բարձրաստիճան քաղաքական և տնտեսական պատվիրակության գլխավորությամբ։ Նա առանձնազրույց է ունենալու Էրդողանի հետ, որին հաջորդելու է Իրան-Թուրքիա տնտեսական համագործակցության բարձրագույն խորհրդի 8-րդ հանդիպումը՝ երկու երկրների նախագահների գլխավորությամբ։
Այնուհետև նախագահները հանդես են գալու համատեղ մամուլի ասուլիսով։ Այցի ընթացքում Ռաիսին նաև հանդիպելու է իրանցի և թուրք գործարարների հետ։
Հավելենք, որ Ռաիսին պատրաստվում էր Թուրքիա մեկնել հունվարի 5-ին, սակայն այս այցը հետաձգվել էր հունվարի 3-ին Քերմանում տեղի ունեցած պայթյունների հետևանքով։ Իրանի Քերման քաղաքում մի քանի պայթյուն էր որոտացել Իսլամական հեղափոխության պահապանների կորպուսի «Ալ Քուդս» հատուկ ստորաբաժանման նախկին հրամանատար, գեներալ Ղասեմ Սոլեյմանիի (զոհվել է Բաղդադում 2020 թվականի հունվարի 3-ին ԱՄՆ ռազմաօդային ուժերի ավիահարվածից հետո) հիշատակի օրը։ Զոհվել էր 103 մարդ, առնվազն 211-ը՝ վիրավորվել: Իրանը պայթյուններըն ահաբեկչություն է որակել։
Մինչ այդ էլ, Թուրքիա Ռաիսի այց էր նախատեսվում 2023 թվականի նոյեմբերի 28-ին, սակայն այն չեղարկվել էր։
Էմմա Չոբանյան
