Ուկրաինան նոր զանգվածային հրթիռային հարձակման է ենթարկվել․ կան մարդկային կորուստներ ու վիրավորներ

Երեքշաբթի առավոտյան Կիևում պայթյուններ են լսվել, իշխանությունները հայտնել են քաղաքում հակաօդային պաշտպանության համակարգերի աշխատանքի մասին, հայտնում է BBC-ի ռուսական ծառայությունը։
«Կիևում հակաօդային պաշտպանությունն է աշխատում։ Մնացեք ապաստարաններում, քանի դեռ օդային հարձակման նախազգուշացումը չի ավարտվել»,- Telegram-ում գրել է Կիևի քաղաքային ռազմական վարչակազմի ղեկավար Սերգեյ Պոպկոն։ Սվյատոշինսկի թաղամասում հրթիռային հարվածի հետևանքով կայանված մեքենաներ են հրդեհվել։ Կիևի քաղաքապետ Վիտալի Կլիչկոն հայտնել է, որ Սոլոմենսկի շրջանում աշխատում են շտապօգնության ծառայությունները։  Նա հայտնել է 7 տուժածի մասին։ «Վեց մարդ հոսպիտալացվել է, մեկ տուժած՝ 13-ամյա մի տղա, տեղում բժիշկների կողմից բուժօգնություն է ստացել»,- Telegram ալիքում հայտնել է Կլիչկոն։

Նոր պայթյուններ են գրանցվել նաև Խարկովում, ինչպես նաև Դնեպրոպետրովսկի շրջանի Պավլոգրադ և Սումիի շրջանի Շոստկա քաղաքում։ «Առավոտյան հրետակոծության արդյունքում բազմաբնակարան շենքի մուտքն ամբողջությամբ ավերվել է։ Այժմ փրկարարները փորձում են մաքրել փլատակները՝ մարդկանց գտնելու համար»,- իր Telegram ալիքում գրել է Խարկովի քաղաքապետ Իգոր Տերեխովը։  Հարվածների հետևանքով քաղաքի որոշ հատվածներ զրկված են էլեկտրականությունից և ջրից։

Ուկրաինայի ՆԳՆ ղեկավար Իգոր Կլիմենկոն իր հերթին հայտնել է, որ ժամը 08:45-ի դրությամբ Ուկրաինայում առավոտյան հրթիռային հարձակման հետևանքով 5 մարդ է զոհվել, մոտ 30-ը՝ վիրավորվել ։
Ռուսական կողմը չի մեկնաբանել Ուկրաինայի քաղաքների վրա զանգվածային հրթիռային հարձակումը։