19.12.2025 | 03:00
Կոնֆերենցիաների լիգա. «Նոայի» հավանական մրցակիցները փլեյ-օֆֆում
Ուկրաինական պատերազմի ելքը կորոշի աշխարհի ճակատագիրը․ ՆԱՏՕ-ի պաշտոնյա
Քաղաքականություն
17.01.2024 | 18:09
ՆԱՏՕ-ն կաջակցի Ուկրաինային Ռուսաստանի դեմ պաշտպանական պատերազմին ամեն օր, վստահեցրել է ՆԱՏՕ-ի ռազմական կոմիտեի նախագահ Ռոբերտ Բաուերը՝ Բրյուսելում, փոխանցում է DW-ի ռուսական ծառայությունը։
«Որովհետև այս պատերազմի ելքը կորոշի աշխարհի ճակատագիրը»,- ընդգծել է նա:
Ըստ ՆԱՏՕ-ի պաշտոնյայի՝ Ուկրաինայի դեմ Ռուսաստանի պատերազմը երբեք չի ասոցացվել Ռուսաստանի Դաշնության անվտանգությանը սպառնացող որևէ իրական սպառնալիքի հետ, որը կգար Ուկրաինայից կամ ՆԱՏՕ-ից։
«Այս պատերազմը պայմանավորված է նրանով, որ Ռուսաստանը վախենում է մի բանից, որը շատ ավելի հզոր է, քան երկրագնդի ցանկացած ֆիզիկական զենք՝ ժողովրդավարությունը: Եթե Ուկրաինայում մարդիկ կարող են ունենալ ժողովրդավարական իրավունքներ, ապա Ռուսաստանում մարդիկ նույնպես շուտով կցանկանան ունենալ դրանք»,- նշել է Բաուերը։
Նրա կարծիքով՝ ուկրաինացի ժողովուրդը և բանակը պաշտպանում են ժողովրդավարությունն այնպես, ինչպես աշխարհը երբեք չի տեսել․ «Պատերազմի խավարում նրանք լույսի փարոս են, որը ցույց է տալիս աշխարհին, թե ինչ է նշանակում պայքարել հանուն նրա, ինչին հավատում ես»։
Ըստ Բաուերի՝ ՆԱՏՕ-ն պաշտպանում է ոչ միայն դաշինքի անդամ երկրների միլիարդավոր բնակիչների ֆիզիկական անվտանգությունը, այլև նրանց ազատությունն ու ժողովրդավարությունը՝ նշելով, որ ՆԱՏՕ-ի հավաքական պաշտպանությունն ուժեղացնելու և Ուկրաինային գոյատևման պայքարում աջակցելու համար անհրաժեշտ է ամբողջ հասարակության մոտեցումը։
«Մեզ պետք է, որ պետական և մասնավոր կառույցները փոխեն իրենց մտածելակերպը՝ անցնելով մի դարաշրջանից, երբ ամեն ինչ ծրագրված էր, կանխատեսելի, վերահսկելի, այնպիսի դարաշրջան, երբ ամեն ինչ կարող է տեղի ունենալ ցանկացած պահի, երբ պետք է սպասել անսպասելին»,- հավելել է նա։
Էմմա Չոբանյան
