01.11.2024 | 23:19
Հրդեհ Գյումրու տներից մեկում
Հայտնի է դարձել, թե երբ է ՌԴ-ում սկսվելու նախընտրական քարոզարշավը
Քաղաքականություն
17.01.2024 | 16:27
ՌԴ նախագահական ընտրությունների նախընտրական քարոզարշավի ընթացքում ԶԼՄ-ների քարոզարշավը կսկսվի փետրվարի 17-ին և կավարտվի մարտի 14-ին։ Այս մասին հայտարարել է ՌԴ Կենտրոնական ընտրական հանձնաժողովի ղեկավար Էլլա Պամֆիլովան, փոխանցում է ՌԻԱ Նովոստին։
Նա հավելել է, որ թեկնածուները կարող են քարոզչական նյութեր՝ թռուցիկներ և պաստառներ բաժանել առաջադրվելուց անմիջապես հետո, նույնիսկ գրանցումից առաջ։
«Այն (լրատվամիջոցներում քարոզչության շրջանը) սկսվում է փետրվարի 17-ին, այսինքն՝ քվեարկության առաջին օրվա մեկնարկից 28 օր առաջ, և ավարտվում է մարտի 14-ին ներառյալ»,- ասել է Պամֆիլովան։
Ավելի վաղ նա հայտնել էր, որ ՌԴ նախագահական ընտրությունների նախընտրական արշավին մասնակցում է 11 մարդ։ Նրա խոսքով՝ 8 թեկնածու առաջադրվել է քաղաքական կուսակցությունների կողմից, ևս 3-ն ինքնաառաջադրվել են։
Ավելի վաղ հաղորդվում էր, որ դեկտեմբերի 23-ից Ռուսաստանի գործող ղեկավար Վլադիմիր Պուտինի՝ նոր ժամկետով առաջադրվելու օգտին ավելի քան 1,3 միլիոն ստորագրություն է հավաքվել։ Այս տվյալները ներկայացրել է նախընտրական շտաբի համանախագահ Մարիաննա Լիսենկոն։
Քաղաքագետ Ալեքսանդր Կինևն էլ հայտարարել էր, որ պետության ղեկավարի ընտրությունների անցկացումն անհրաժեշտ է նախագահի լեգիտիմությունը հաստատելու համար։ Նա ընդգծել է, որ ընթացակարգն անհրաժեշտ է նույնիսկ այն դեպքում, երբ քվեարկության արդյունքն ակնհայտ է, արդյունքները հնարավորություն են տալիս հետագայում վկայակոչել մեծամասնության կարծիքը։
Փորձագետը հրաժարվել է «թանկարժեք» որակել ընտրության ընթացակարգը։ Նրա խոսքով՝ ամեն դեպքում, թեկնածուները ծախսում են սեփական միջոցները, ոչ թե պետական միջոցները։
