ԱՄՆ-ի սահմանած նոր կանոնները Թուրքիայի և ՌԴ-ի միջև ֆինանսական հաշվարկների համար դժվարություններ են ստեղծել

ՌԴ-ից Թուրքիա դրամական փոխանցումների հետ կապված խնդիրները, որոնք գրանցվում են վերջերս, կապված են ԱՄՆ Ֆինանսների նախարարության արտաքին ակտիվների վերահսկողության գրասենյակի (OFAC) կարգավորող միջոցառումների հետ: Այս մասին ՏԱՍՍ-ին հայտնել է Թուրքիայի բանկային ոլորտի աղբյուրը։

«Դեկտեմբերի 22-ին հրապարակվել է նոր կարգավորիչ գործողություն։ Այն ունի լայն ձևակերպումներ։ Այդ կանոնների համաձայն՝ Ռուսաստանի ռազմական ջանքերին աջակցող օտարերկրյա բանկերը նույնպես կարող են ենթարկվել պատժամիջոցների: Միաժամանակ, միջնորդական ծառայությունների մատուցումը բոլոր գործարքներում, բացառությամբ՝ սննդի և դեղորայքի, գործնականում արգելված է։ Քանի որ հրապարակված կարգավորիչ միջոցառումները չափազանց լայն են ձևակերպված, անհրաժեշտություն կա լրացուցիչ պարզաբանումներ ստանալու»,- ասել է լրատվամիջոցի զրուցակիցը։

Նա նշել է, որ հենց այդ պատճառով  է, որ Ռուսաստանի և Թուրքիայի միջև ֆինանսական հաշվարկներում ընդհատումներ են լինում, փաստացի բանկերը գտնվում են «սպասման ռեժիմում»։

Ավելի վաղ Econim թերթը, վկայակոչելով գործարար համայնքի իր աղբյուրներին, հայտնել էր, որ թուրք արտահանողները բախվել են բանկերի խնդրին, որոնք հրաժարվում են անցկացնել Ռուսաստանից դրամական փոխանցումները, որոնք նախատեսված են ապրանքների մատակարարումների դիմաց վճարման համար։ Հաղորդվում է, որ խնդիրը սկսել է լրջանալ անցյալ տարվա դեկտեմբերից:

Այդ ժամանակ շատ արտահանողներ սկսել էին բողոքել, որ չեն կարող ստանալ վճարումները ՌԴ-ից թուրքական լիրայով և ռուբլով։ Նման փոխանցումները կա՛մ ուղղակիորեն հետ են ուղարկվել որոշ մասնավոր բանկերի կողմից, կա՛մ մերժվել են գործարքի սկզբնական փուլում՝ այն պատճառով, որ վճարումը կատարվել է պատժամիջոցների տակ գտնվող ապրանքների համար։ Լրատվամիջոցի տվյալներով՝ հունվարի 1-ից նման դրամական փոխանցումները գրեթե դադարեցվել են։

Էմմա Չոբանյան