Քաղաքականություն
12.01.2024 | 21:14
Եմենի հութիները խոստացել են պատասխան հարված հասցնել կոալիցիայի դաշնակիցների ավիահարվածներին, գրում է BBC-ի ռուսական ծառայությունը:
«Բոլոր ներգրավվածները կվճարեն դրա համար։ Մենք չենք դադարեցնի գրոհները, քանի դեռ չեք հեռացել տարածաշրջանից, և մենք չենք դադարի ձեզ տրորել, մինչև ձեզ չտեսնենք ստորացված։ Եմենն այժմ Մեծ Բրիտանիային ու ԱՄՆ-ին ծովում դաս է տալիս»,- հութիների ռազմական ղեկավար, գեներալ-մայոր Ջաֆահ Աբդուլսալամը գրել է X-ի իր միկրոբլոգում։
Կարճ ժամանակ անց Աբդուլսալամը հայտարարել է, որ հութիները պատասխան հարձակումներ են իրականացրել Կարմիր ծովում գտնվող ամերիկյան և բրիտանական նավերի վրա։ Սակայն դեռևս դաշնակիցների կողմից ոչ մի հաստատում կամ հերքում չի եղել:
«Ամերիկացիների և բրիտանացիների բոլոր սպառնալիքները մեզ չեն վախեցրել և չեն վախեցնելու, և չեն ստիպի մեզ հրաժարվել Գազայի մեր եղբայրներին աջակցելու մեր պարտականությունից»,- գրել է հութիների ղեկավարության մեկ այլ անդամ՝ Աբդուլքադեր ալ-Մորտադան՝ հավելելով․ «Նրանք ավելի շուտ կամրապնդեն մեր հավատքը և վստահությունը մեր դիրքորոշման ու մեր գործի արդարության վերաբերյալ»:
