16.12.2025 | 12:45
Մոսկվան ուզում է մասնակցել TRIPP-ին,իսկ Թեհրանը դեմ է նախագծին// ԱԽ քարտուղարը Լոնդոն կմեկնի․ ԼՈՒՐԵՐ
Oppenheimer-ը գերազանցեց Barbie-ին․ հայտնի են «Ոսկե Գլոբուս»-ի հաղթողները
Քաղաքականություն
08.01.2024 | 17:00
Քրիստոֆեր Նոլանի «Oppenheimer» ֆիլմը, ինչպես ակնկալվում էր, դարձել է 81-րդ «Ոսկե գլոբուսի» աստղը՝ ստանալով հինգ մրցանակ, այդ թվում՝ «Լավագույն դրամատիկ ֆիլմ» անվանակարգում, գրում է Euronews-ը։
Իսկ ահա Յորղոս Լանտիմոսի «Poor things» կատակերգությունը հաղթել է «Barbie»-ին «Լավագույն կատակերգություն կամ մյուզիքլ» անվանակարգում։
«Barbie»-ն և «Oppenheimer»-ն անցյալ տարվա գլխավոր կիոհիթերն էին, «Barbenheimer» կինոդիմակայությունը նույնիսկ համացանցային ֆենոմեն դարձավ։ Սակայն այս անգամ «Oppenheimer»-ը գերազանցեց «Barbie»-ին։
«Oppenheimer»-ը, որը պատմում է հայտնի ամերիկացի ֆիզիկոս Ռոբերտ Օփենհայմերի կյանքի մասին, «Ոսկե գլոբուս» է ստացել «Լավագույն ֆիլմ» (դրամա), «Լավագույն ռեժիսոր» (Քրիստոֆեր Նոլան), «Լավագույն դրամատիկ դերասան» (Կիլիան Մերֆի), «Երկրորդ պլանի լավագույն դերասան» (Ռոբերտ Դաունի կրտսեր) և «Լավագույն երաժշտություն» (Լյուդվիգ Գորանսոն) անվանակարգերում։
Կատակերգություն ժանրում «Լավագույն դերասանուհի» անվանակարգում հաղթել է Էմմա Սթոունը՝ «Poor things» ֆիլմում դերակատարման համար։
«Լավագույն դրամատիկ դերասանուհի» անվանակարգում էլ հաղթող է ճանաչվել Լիլիան Գլեդսթոունը՝ Մարտին Սկորսեզեի «Ծաղկի լուսնի մարդասպանները» ֆիլմի համար։ Նա ԱՄՆ բնիկ ժողովուրդների առաջին ներկայացուցիչն է, որն արժանանում է նման մրցանակի։
«Barbie» ֆիլմը, որը հավաքել է ավելի քան 1,4 միլիարդ դոլար համաշխարհային կինովարձույթում և առաջադրվել ամենաշատ՝ ութ անվանակարգում, հաղթել է միայն 2-ում՝ Բիլի Այլիշի «What Was I Made For» երգի ու «Կինոմատոգրաֆիկ և դրամարկղային ձեռքբերումների» համար։
Էմմա Չոբանյան
