Քաղաքականություն
05.01.2024 | 15:39
Գերմանիան Ուկրաինային է մատակարարել հակաօդային պաշտպանության նոր համակարգ, զինամթերք և այլ ռազմական տեխնիկա՝ ռուսական ագրեսիայից պաշտպանվելու համար։ DW-ի ռուսական ծառայության փոխանցմամբ՝ Ուկրաինան, ի թիվս այլ բաների, ստացել է Skynex հակաօդային պաշտպանության համակարգ՝ զինամթերքով, նոր հրթիռներ Iris-T SLM հակաօդային պաշտպանության համակարգի համար և TRML-4D օդային հսկողության երկու ռադար։
Բացի այդ, մատակարարվել են ևս տասը Marder հետևակի մարտական մեքենաներ՝ զինամթերքով և պահեստամասերով, ականազերծման Wisent երկու զրահապատ մեքենա, ևս մեկ Biber մեքենա՝ պահեստամասերով։ Ռազմական օգնության նոր փաթեթը ներառում է նաև հրետանային զինամթերք, հակատանկային ականներ, ցամաքային հսկողության ռադարներ, բեռնատարներ, միկրոավտոբուսներ, ամենագնացներ, ձմեռային համազգեստ։
«Գերմանիան աջակցում է Ուկրաինային Բունդեսվերի պաշարներից սարքավորումների և սպառազինության, ինչպես նաև արդյունաբերական մատակարարումների միջոցով, որոնք ֆինանսավորվում են գերմանական կառավարության սպառազինության ծրագրից»,- ասվում է գերմանական կողմի հաղորդագրությունում։
2022 թվականին այդ միջոցները կազմել են 2 միլիարդ եվրո, 2023 թվականին՝ մոտ 5,4 միլիարդ եվրո՝ «գումարած հետագա տարիների համար մոտ 10,5 միլիարդ եվրոյի պարտավորությունների դրույթները»։
Դրանք պետք է օգտագործվեն առաջին հերթին Ուկրաինայի ռազմական աջակցության համար, նշում են Գերմանիայի իշխանությունները։
Ուկրաինայի նախագահ Վլադիմիր Զելենսկին X-ում գրառմամբ շնորհակալություն է հայտնել Գերմանիայի կառավարությանը և անձամբ կանցլեր Օլաֆ Շոլցին ռազմական օգնության նոր փաթեթի համար։
«Այն ժամանակին է և ուղղված է մեր առաջնահերթություններին, հատկապես հակաօդային պաշտպանությանը։ Skynex առաջադեմ համակարգը և հավելյալ Iris-T SLM հրթիռները կուժեղացնեն մեր հակաօդային պաշտպանությունը և կփրկեն բազմաթիվ կյանքեր»,- գրել է Զելենսկին:
