«Հայաստանի ազգային կինոկենտրոն»-ը մինչև օրս չունի շենքային պայմաններ

Օրերս, ՀՀ մշակույթի նախարար Լիլիթ Մակունցը, նախարարի տեղակալ Վահե Բուդումյանի և «Հայաստանի ազգային կինոկենտրոն» ՊՈԱԿ-ի տնօրեն Շուշանիկ Միրզախանյանի ուղեկցությամբ այցելել է Կինոկենտրոնին պատկանող Տերյան 3 ա հասցեում գտնվող տարածք. տեղեկացնում է նախարարության լրատվական վարչությունը:

Այցի նպատակն էր ծանոթանալ Կինոկենտրոնին պատկանող տարածքի վերականգնման , վերանորոգման աշխատանքների հնարավորությանը և անհրաժեշտ ֆինանսական աղբյուրներին:

Շուշանիկ Միրզախանյանը ներկայացրել է, որ տարածքը Կինկոնենտրոնին փոխանցելու օրվանից (2006 թվական) ունի վերանորոգման անհրաժեշտություն: Նա նաև փոխանցել է, որ Կինոկենտրոնը 2007 թվականին «Հանարդնախագիծ» ԲԲԸ-ին պատվիրել էր Տերյան 3 ա տարածքի վերանորոգման համար կազմել նախագծանախահաշվային փաստաթղթեր, ինչպես նաև ներկայացնել վերանորոգման համար անհրաժեշտ ֆինանսական հաշվարկներ: Շենքի վերանորոգման համար անհրաժեշտ է եղել ավելի քան 40 մլն ՀՀ դրամ, որը պետության կողմից չի տրամադրվել:

Կինոկենտրոնի տնօրենը հավելել է, որ կանոնադրական գործունեության ապահովման համար կազմակերպությունը 2006 թվականից մինչև այսօր Երևանում վարձակալել է տարածքներ՝ վճարելով ավելի քան 113 մլն ՀՀ դրամ:

ՀՀ մշակույթի նախարար Լիլիթ Մակունցը «Հայաստանի ազգային կինոկենտրոնի» տնօրեն Շուշանիկ Միրզախանյանին հանձնարարել է Տերյան 3 ա շենքի 147,6 քմ մակերեսով տարածքի վերանորոգման նախագծանախահաշվային փաստաթուղթ կազմել և տրամադրել ՀՀ մշակույթի նախարարությանը: