Հութիները կտրել են Ասիայի և Եվրոպայի միջև հիմնական առևտրային ճանապարհը

Իսրայելի պատերազմը ՀԱՄԱՍ-ի հետ ավելի քան երկու ամսվա ընթացքում առաջին անգամ հանգեցրել է համաշխարհային առևտրի լայնածավալ խափանման։ Եմենի հութիները, ի նշան պաղեստինցիների հետ համերաշխության, գնդակոծել են առևտրային նավերը, ինչի հետևանքով միջազգային խոշորագույն նավագնացային ընկերությունների համբերությունը սպառվել է․ նրանք դադարեցրել են բեռնարկղերի, նավթի, հեղուկ գազի և այլ ապրանքների փոխադրումը Եվրոպայի և Ասիայի միջև հիմնական առևտրային ճանապարհով՝ Կարմիր ծովով, Սուեզի ջրանցքով և Բաբ էլ-Մանդեբի նեղուցով, գրում է BBC-ի ռուսական ծառայությունը:

Ինչպե՞ս է հութիների շրջափակումը սպառնում համաշխարհային առևտրին և որքա՞ն ժամանակ պետք է համակերպվի համաշխարհային տնտեսությունը սրա հետ: Ըստ աղբյուրի՝ հութի ապստամբները նոյեմբերից գրոհում են առևտրային նավերը Բաբ ալ-Մանդեբ նեղուցում՝ ի համերաշխություն ՀԱՄԱՍ-ի հետ:

Հութիները վերահսկում են Եմենի զգալի մասը, ունեն Իրանի աջակցությունը և որպես թշնամիներ են համարում Սաուդյան Արաբիային, ԱՄՆ-ին և Իսրայելին։ Նրանք պնդում են, որ իրենց թիրախը եղել է իսրայելական առևտրային նավատորմը, սակայն Իսրայելի հետ կապ չունեցող նավերը նույնպես կրակի են ենթարկվել անօդաչու սարքերից և հրթիռներից:

Արդյունքում, աշխարհի նավատերերի մեծ մասը, ներառյալ՝ MSC, Maersk, CMA CGM հսկաները, սկսել են բեռնարկղային նավերն ուղարկել ավելի երկար ճանապարհով՝ շրջանցելով Աֆրիկան: Եթե նրանց օրինակին հետևեն հածանավերը ևս, ապա կրիտիկական կարևորություն ունեցող Սուեզի ջրանցքով ծովային երթևեկությունը կդադարեցվի: