08.11.2026 | 00:09
Կրակոցներ Կրակովի կենտրոնում․ զոհերի թիվը հասել է 6-ի, կա 15 վիրավոր
Մոլդովան մտադիր է մինչև 2024 թվականի վերջը լքել ԱՊՀ-ն
Քաղաքականություն
21.12.2023 | 18:23
Մոլդովան Անկախ Պետությունների Համագործակցությունից (ԱՊՀ) դուրս գալու գործընթացը կավարտի մինչև 2024 թվականի վերջ՝ հետևողականորեն չեղարկելով այս կազմակերպության շրջանակում կնքված մնացած բոլոր համաձայնագրերը։ Քիշնևը քայլ առ քայլ դուրս է գալիս համաձայնագրերից՝ նախապես ուսումնասիրելով իրավիճակը յուրաքանչյուր ոլորտում։ Exclusiv հեռուստաալիքի եթերում այս մասին ասել է Մոլդովայի խորհրդարանի արտաքին քաղաքականության և եվրոպական ինտեգրման հանձնաժողովի նախագահ Դոյնա Գերմանը։
Միաժամանակ, Գերմանը համաձայն չէ մի շարք ընդդիմադիր քաղաքական գործիչների այն հայտարարությունների հետ, թե Մոլդովան կարող է տուժել ԱՊՀ-ից դուրս գալու պատճառով։ Նրա խոսքով՝ այդ քայլը բացասական հետևանքներ չի ունենա Մոլդովայի տնտեսության համար, քանի որ չի բացառում երկկողմ համագործակցությունը ԱՊՀ երկրների հետ։
«Սա մանիպուլյացիայի և ապատեղեկատվության մի մասն է։ Ակնհայտ է, որ մենք տնտեսապես կորցնելու ոչինչ չունենք։ Նախ, եթե խոսենք տնտեսապես պայմանագրերի մասին, մենք տարեկան վճարում ենք այդ պայմանագրերով, եթե խզենք այդ պայմանագրերը, կազատվենք այդ վճարումներից»,- ընդգծել է պատգամավորը։
2023 թվականի սկզբին Մոլդովայի կառավարությունը հայտարարեց, որ ուսումնասիրում է ԱՊՀ-ում մնալու հետագա իրագործելիությունը։ Տարվա ընթացքում Քիշնևը դուրս է եկել կազմակերպության շրջանակում տասնյակ համաձայնագրերից։
