Պուտինը չի կարողացել հասնել իր հիմնական նպատակին՝ Ուկրաինան ջնջել քարտեզից ու ներառել ՌԴ կազմում․ Բլինքեն

ԱՄՆ պետքարտուղար Էնթոնի Բլինքենը տարվա ամփոփիչ մամուլի ասուլիսում հայտարարել է, որ Վաշինգտոնը կշարունակի համախմբել աշխարհի երկրներին՝ աջակցելու Ուկրաինայի ազատությանն ու անկախությանը և ապահովելու, որ Ռուսաստանի ագրեսիան մնա որպես ռազմավարական ձախողում։

«Պուտինն արդեն ձախողել է իր հիմնական նպատակին հասնելը՝ Ուկրաինան ջնջել քարտեզից ու ներառել Ռուսաստանի կազմում։ Ռազմի դաշտում ծանր տարի էր, բայց ևս մեկ անգամ ուկրաինացիներն արեցին այն, ինչ ոչ ոք հնարավոր չէր համարում։ Նրանք դիմադրեցին աշխարհի ամենամեծ բանակներից մեկին, նրանք պահեցին տարածքները՝ չնայած ռուսական բազմաթիվ հարձակումներին, նրանք ՌԴ-ի նավատորմը հետ մղեցին Սև ծով և բացեցին միջանցք, որը թույլ էր տալիս հացահատիկի և այլ ապրանքների արտահանումը աշխարհով մեկ»,-ասել է Բլինքենը։

Նա նշել է, որ Ռուսաստանը ռազմական, տնտեսական, դիվանագիտական առումով ավելի թույլ է, ՆԱՏՕ-ն ավելի մեծ է, ուժեղ ու ավելի միասնական, քան իր 75-ամյա պատմության որևէ պահի։ Դաշինիքին միացել է Ֆինլադիան ու շուտով միանալու է Շվեդիան։

Բլինքենն ընդգծել է, որ Եվրոպան ավելի քան 110 մլրդ դոլար է հատկացրել Ուկրաինային, իսկ ԱՄՆ-ը՝ մոտ 70 մլրդ դոլար։ Ճապոնիան, Կորեան, Ավստրալիան և խաղաղօվկիանոսյան տարածաշրջանի այլ երկրներ նույնպես ակտիվ միջոցներ են ձեռնարկել՝ սկսած Ուկրաինայի էներգետիկ համակարգի վերականգնման հարցում օգնությունից մինչև լայնածավալ ռազմական և հումանիտար օգնություն:

«Ինչպես մենք, այնպես էլ նրանք գիտեն, որ Ուկրաինային աջակցելը կենսական նշանակություն ունի հավանական ագրեսորներին ամենուր ցույց տալու համար, որ մենք կանգնելու ենք նրանց դեմ, ովքեր ձգտում են ուժով սահմանները վերագծել»,-հայտարարել է ԱՄՆ պետքարտուղարը։