21.11.2024 | 23:30
Թուրքիայում ընդդիմադիր քաղաքապետներին դատապարտել են ազատազրկման «ահաբեկչության» մեղադրանքով
«10 միլիոն ծառ» նախաձեռնության շրջանակներում տնկվել է շուրջ 4 մլն 530 հազար ծառ
Հասարակություն
17.12.2023 | 12:44
«10 միլիոն ծառ» նախաձեռնության շրջանակներում կատարվող աշխատանքները չեն ավարտվել․ Factor.am-ի հարցմանն ի պատասխան հայտնում են Շրջակա միջավայրի նախարարությունից։ «10 միլիոն ծառ» նախաձեռնության մասին 2019 հոկտեմբերի 16-ին «Գլոբալ ինովացիոն ֆորում Փոխակերպելով բանականությունը» ամենամյա համաժողովի բացման արարողության ժամանակ հայտարարել էր Նիկոլ Փաշինյանը։
Նախարարությունից փոխանցում են, որ 2020 թվականի աշնանից մինչ օրս իրականացվել են համապետական ծառատունկեր և շաբաթօրյակներ, որոնց ժամանակ տնկվել է 530 000 ծառ։ Շրջակա միջավայրի նախարարության անտառային կոմիտեի «Հայանտառ» ՊՈԱԿ-ի «Վանաձորի անտառտնտեսություն» մասնաճյուղի շուրջ 3 հա տարածքում տնկվել է Լատվիայի կառավարության կողմից տրամադրված 10000 հատ կեչի։
«ՀՀ պետական բյուջեի և այլ կազմակերպությունների ֆինանսավորմամբ նախարարության անտառային կոմիտեի «Հայանտառ» ՊՈԱԿ-ի «Անտառտնտեսություն» մասնաճյուղերի տարածքներում տնկվել է շուրջ 2 000 000 ծառ, իսկ հասարակական կազմակերպությունների կողմից (2022 թվականի դրությամբ)՝ ևս 2 000 000 ծառ: Ընդհանուր առմամբ` տնկվել է շուրջ 4 530 000 ծառ։ Աշխատանքները կատարվել են Հայաստանի բոլոր մարզերում և Երևանում», – տեղեկացնում են ՇՄ նախարարությունից։ Տնկված ծառերը Հայաստանի հիմնական անտառկազմող ծառատեսակներն են՝ կաղնի, թխկի, սոճի, հացենի և այլն։ Հարցին, թե որքա՞ն գումար է հատկացվել նախաձեռնության շրջանակում տունկ կազմակերպելու համար, նախարարությունից պատասխանել են, որ աշխատանքները տարբեր կազմակերպությունների կողմից են իրականացվել, որի պատճառով չկա տեղեկատվություն հատկացված գումարի հստակ չափի մասին։
Համապետական ծառատունկի և շաբաթօրյակի շրջանակներում տնկված ծառերի պահպանվածությունը կազմում է 35 – 50 %, իսկ պետական բյուջեի և այլ կազմակերպությունների ֆինանսավորմամբ տնկված ծառերի պահպանվածությունը միջինում կազմում է շուրջ 60 %։ Շրջակա միջավայրի նախարարությունը նշում է՝ աշխատանքները կրում են շարունակական բնույթ։
Անի Թամրազյան
