13.12.2025 | 16:15
Դեկտեմբերի 14-ի գիշերը Երևանի հանրային տրանսպորտն ավելի երկար կաշխատի
Մենք հայ ժողովրդի կողքին ենք․ Հունաստանի ՊՆ ղեկավարը՝ Սուրեն Պապիկյանին
Քաղաքականություն
15.12.2023 | 13:38
Հունաստանի պաշտպանության նախարար Նիկոս Դենդիասը ՀՀ պաշտպանության նախարար Սուրեն Պապիկյանի հետ նախօրեին հանդիպումից հետո կայացած մամուլի ասուլիսում հայտարարել է, որ հայ ժողովրդի կողքին են։ Նա ընդգծել է, որ ՀՀ-ի հետ համագործակցությունը դուրս է գալիս երկկողմ շրջանակներից՝ հասնելով եռակողմ հարաբերությունների Հայաստանի, Հունաստանի ու Կիպրոսի միջև։
«Այսօրվա մեր հանդիպումը համընկնում է մեծ լարվածության շրջանի հետ։ Իրավիճակը Կովկասում, զարգացումները ուկրաինական ճակատում, Մերձավոր Արևելքում անկայունության բազմաթիվ օջախներ են ստեղծում տարածաշրջանում։ Այդ անկայունության դեմ Հունաստանն ամուր տեսակետ է պահպանում: Մենք աջակցում ենք երկխոսությանը ՄԱԿ-ի կանոնադրության և միջազգային իրավունքի սկզբունքների հիման վրա։ Մենք աջակցում ենք բոլոր պետությունների տարածքային ամբողջականությանը և ինքնիշխանությանն ու վճռականորեն հանդես ենք գալիս սահմանների բռնի վերափոխման ցանկացած փորձի դեմ»,- ասել է Դենդիասը։
Նա նաև նշել է, որ Աթենքը «դատապարտում է ահաբեկչությունը, պայքարում է խաղաղ բնակիչների պաշտպանության համար, պաշտպանում է յուրաքանչյուրի իրավունքը՝ ապրելու իր պապենական տներում»։
Անդրադառնալով Հայաստան-Ադրբեջան խաղաղության բանակցություններին՝ Դենդիասը նշել է, որ աջակցում են այդ գործընթացին։
«Մենք աջակցում ենք Եվրամիության մասնակցությամբ Ադրբեջանի և Հայաստանի միջև բանակցությունների վերսկսմանը, որպեսզի տարածաշրջանի ժողովուրդների համար ստեղծվեն խաղաղության և անվտանգության պայմաններ։ Բնականաբար, ինչպես մեզանից ակնկալվում է, մենք հայ ժողովրդի կողքին ենք»,- հայտարարել է Հունաստանի ՊՆ ղեկավարը։
Հիշեցնենք, որ Հայաստանի և Հունաստանի պաշտպանության նախարարները նախօրեին ստորագրել են «Հայաստանի Հանրապետության կառավարության և Հունաստանի Հանրապետության կառավարության միջև ռազմատեխնիկական համագործակցության մասին» համաձայնագիրը։
Էմմա Չոբանյան
