Պետք է հասկանալ՝ արդյոք պետությունը հնարավորություն ունի՞ ապահովել էլեկտրոնային ստորագրության պատշաճ ապահովում բոլոր քաղաքացիների համար․ Հերիքնազ Տիգրանյան

Հայաստանում բարեգործության ոլորտի բարեփոխումներին, հասարակական կազմակերպություններին, ինչպես նաեւ աշխատանքային պայմանագրերի էլեկտրոնային հարթակ տեղափոխման օրենսդրական նախագծին առնչվող հարցերը դեկտեմբերի 11-ին քննարկել են ԱԺ աշխատանքի եւ սոցիալական հարցերի մշտական հանձնաժողովի նախագահ Հերիքնազ Տիգրանյանը, հանձնաժողովի անդամներ Զարուհի Բաթոյանը, Գայանե Եղիազարյանը, Լիլիթ Ստեփանյանը, Մարիամ Պողոսյանը եւ Ամերիկայի առեւտրի պալատը Հայաստանում (AmCham) կազմակերպության ներկայացուցիչները․ տեղեկացնում են ՀՀ ԱԺ-ից։

Քննարկման մասնակիցներն անդրադարձել են ՀՀ աշխատանքային օրենսգրքում նախատեսվող փոփոխությանը, որը վերաբերում է աշխատանքային պայմանագրերին, ինչն առաջարկվում է կնքել էլեկտրոնային տարբերակով: Նախաձեռնությունը քննարկվել եւ մշակվել է մի շարք գերատեսչությունների հետ համատեղ: Հանձնաժողովի նախագահ Հերիքնազ Տիգրանյանի խոսքով օրենսդրական նախաձեռնության ընդունումն ավելի տեսանելի եւ թափանցիկ կդարձնի գործատու-աշխատող հարաբերությունների առկայությունը եւ կնվազեցնի թաքնված աշխատուժի ռիսկերը: Այն նաեւ հնարավորություն կտա ՀՀ առողջապահական եւ աշխատանքի տեսչական մարմնին (ԱԱՏՄ) ավելի պարզ գործիքակազմով ստուգել գործատուի մոտ աշխատանքային հարաբերությունների առկայությունը կամ բացակայությունը:

Քննարկման մասնակիցները նշել են այն փաստը, որ ոչ բոլոր գործատուները կամ աշխատանք փնտրող քաղաքացիներն ունեն էլեկտրոնային ստորագրության հնարավորություն:

«Այս պահին պետք է հասկանալ՝ արդյո՞ք պետությունը հնարավորություն ունի ապահովել էլեկտրոնային ստորագրության պատշաճ ապահովում բոլոր քաղաքացիների համար»,- ասել է Հերիքնազ Տիգրանյանը:

Հանդիպմանն անդրադարձ է կատարվել նաեւ բարեգործական ծրագրերի հետ կապված խնդիրներին: Նշվել է, որ այն ձեւակերպումը, որն առկա է «Բարեգործության մասին» ՀՀ օրենքում եւ այն կարգավորումները, որոնք կան Հարկային օրենսգրքում, չեն նպաստում կազմակերպությունների կողմից բարեգործական ծրագրերի իրականացմանը:

Ընդգծվել է, որ ոչ թե կազմակերպությունն է ճանաչվում բարեգործական, այլ՝ ծրագիրը, որն իրականացնում է տվյալ կազմակերպությունը՝ Կառավարության համապատասխան հանձնաժողովի կողմից: Գործընթացը բավականին ժամանակատար է, մինչդեռ բարեգործական ծրագիրը ենթադրում է որոշակի հրատապություն:

Անդրադարձ է կատարվել նաեւ դրամաշնորհով ստացված միջոցների՝ օրենքով սահմանված շեմն անցնելու խնդրին, ըստ որի՝ հասարակական կազմակերպությունը պարտավորվում է ավելացված արժեքի հարկ վճարել:

Նշվել է, որ ՀՀ օրենսդրությամբ սահմանված չէ «դրամաշնորհ» եզրույթը: Առաջարկներ են հնչել հետեւել մեր տարածաշրջանի երկրների օրինակին եւ ընդունել առանձին իրավական ակտ, որը կսահմանի, թե ինչ է դրամաշնորհը: Դա հնարավորություն կտա դրամաշնորհների շրջանակում իրականացվող ծրագրերն ավելի դյուրինացված մեխանիզմով ճանաչել բարեգործական:

Դաշտը բարելավելու նպատակով պատգամավորները պատրաստակամություն են հայտնել կազմակերպել աշխատանքային քննարկում շահագրգիռ կողմերի, օրենսդիրի եւ գործադիրի ներկայացուցիչների մասնակցությամբ: