Ցանկանում ենք աջակցել պետությանը՝ ԼՂ-ից տեղեհանվածների համար ՀՀ-ում արժանապատիվ ապագա ստեղծելու գործում․ ՀՀ-ում Շվեյցարիայի փոխդեսպան

Ս․թ․ դեկտեմբերի 5-6-ը «Հայաստանում գյուղատնտեսության ոլորտում ՄԿՈւ արդիականացում» (ՄԱՎԵՏԱ) ծրագրի շրջանակներում «Ռազմավարական զարգացման գործակալություն» (ՌԶԳ) ՀԿ-ի կողմից կազմակերպվեց մասնագիտական կրթության և ուսուցման (ՄԿՈւ) ոլորտում գործող դոնոր կազմակերպությունների  երկխոսության/քննարկումների հարթակի տարեկան հանդիպումը:

ՄԱՎԵՏԱ ծրագիրը ֆինանսավորվում է միջազգային և տեղական կազմակերպությունների լայն կոալիցիայի կողմից՝ Շվեյցարիայի զարգացման և համագործակցության գործակալության (SDC) գլխավորությամբ և համաֆինանսավորվում է Ավստրիական զարգացման գործակալության (ADA), Գերմանիայի տնտեսական համագործակցության և զարգացման նախարարության (BMZ), Հայաստանի կառավարության, Շվեյցարիայի եկեղեցու օգնության (HEKS/EPER) և Իզմիրլյան հիմնադրամի/Վանանդ Ագրո ՓԲԸ-ի կողմից:

Երկխոսության/քննարկումների հարթակի հերթական հանդիպման նպատակն էր քննարկել Հայաստանում մասնագիտական կրթության և ուսուցման խթանմանն ուղղված գործողությունները։

Համաժողովին մասնակցեցին ՀՀ կրթության, գիտության, մշակույթի և սպորտի նախարարության (ԿԳՄՍՆ), ՀՀ աշխատանքի և սոցիալական հարցերի նախարարության, Հայաստանում Շվեյցարական համագործակցության գրասենյակի (SDC), ՄԱԶԾ և այլ տեղական ու միջազգային կառույցների ներկայացուցիչներ:

Համաժողովին ողջույնի խոսքով հանդես եկան «Ռազմավարական զարգացման գործակալություն» (ՌԶԳ) ՀԿ-ի նախագահ՝ պարոն Մկրտիչ Այվազյանը, ՀՀ-ում Շվեյցարիայի փոխդեսպան և հավասարապես Հայաստանում Շվեյցարիայի զարգացման համագործակցության համար պատասխանատու` պարոն Վերներ Թութը և ՀՀ ԿԳՄՍ նախարարության նախնական (արհեստագործական) և միջին մասնագիտական կրթության վարչության պետ՝ տիկին Արմենուհի Պողոսյանը:

Պարոն Այվազյանն իր խոսքում շնորհակալություն հայտնեց մասնակիցներին ներկա գտնվելու համար և նշեց հարթակի հանդիպումների կարևորությունը:

Պարոն Թութն իր խոսքում ընդգծեց, որ ընդհանուր առմամբ մասնագիտական կրթության, այդ թվում՝ գյուղատնտեսության ոլորտի բարեհաջող բարեփոխման համար առանցքային է պետական կառույցների, տնտեսության ոլորտում ակտիվ ոչ պետական դերակատարների և հազարավոր փոքր, միջին և խոշոր ձեռնարկություններ ներկայացնող մասնավոր հատվածի միջև սերտ համագործակցությունը։

«Եթե շահագրգիռ կողմերը չկարողանան կառուցել և մշտապես պահպանել այդ համագործակցությունը, ապա ամբողջ բարեփոխումը, ամենայն հավանականությամբ, կմնա անավարտ գործընթաց»-ասաց պարոն Թութը:

Նա նաև անդրադարձ կատարեց Լեռնային Ղարաբաղից բռնի տեղահանված անձանց համար աջակցման ծրագրերի անհրաժեշտությանը և նշեց, որ հոկտեմբերին նախաձեռնել են հետազոտություն՝ հասկանալու, թե ինչպես կարող են աջակցել տեղահանված բնակչությանը:

«Մենք ցանկանում ենք աջակցել պետությանը՝ այդ մարդկանց համար Հայաստանում արժանապատիվ ապագա ստեղծելու գործում»,- նշեց պարոն Վերներ Թութը:

Պարոն Թութին հաջորդեց ՀՀ ԿԳՄՍ նախարարության նախնական (արհեստագործական) և միջին մասնագիտական կրթության վարչության պետ՝ տիկին Արմենուհի Պողոսյանը, ով ներկայացրեց ՄԿՈւ ոլորտի օրենսդրական դաշտի բարեփոխումները:

Համաժողովի ընթացքում ներկայացվեց նաև ՀՀ ԿԳՄՍ նախարարության կողմից կատարվող ՄԿՈւ ոլորտի խրախուսման և տեսանելիության բարձրացմանն ուղղված գործիքներն ու «Հայաստանում գյուղատնտեսության ոլորտում ՄԿՈւ արդիականացում» (MAVETA) ծրագրի հաղորդակցման ռազմավարությունը։

Հանդիպումը հնարավորություն ընձեռեց՝ քննարկելու ՄԿՈւ ոլորտի առաջխաղացման համար անհրաժեշտ գործողությունները, մշակել առաջխաղացման ընդհանուր մոտեցում և գործողությունների պլան՝ սահմանելով յուրաքանչյուր շահագրգիռ կողմի հնարավոր ներդրումը: