07.10.2026 | 12:47
Դատախազությունը պահանջում է ՊԵԿ նախկին պաշտոնյայից հօգուտ պետության բռնագանձել 3 անշարժ գույք, մեքենա և շուրջ 450 մլն դրամ
Էրդողանը ժամանել է Աթենք. 70 տարվա մեջ սա Թուրքիայի նախագահի 3-րդ այցն է Հունաստան
Քաղաքականություն
07.12.2023 | 15:43
Թուրքիայի նախագահ Ռեջեփ Թայիփ Էրդողանը մեկօրյա այցով ժամանել է Աթենք։ Նրան օդանավակայում դիմավորել է Հունաստանի ԱԳ նախարար Ջորջ Գերապետիտիսը։ Հունական աղբյուրների փոխանցմամբ՝ Էրդողանը ժամանել է նախատեսվածից շուտ՝ տեղի ժամանակով 11:00-ին։
TRT Haber-ի հաղորդմամբ՝ Էրդողանի հետ Հունաստան են մեկնել արտաքին գործերի նախարար Հաքան Ֆիդանը, գանձապետարանի և ֆինանսների նախարար Մեհմեդ Շիմշեքը, ներքին գործերի նախարար Ալի Յերլիքայան, մշակույթի և զբոսաշրջության նախարար Մեհմեդ Նուրի Էրսոյը, ազգային կրթության նախարար Յուսուֆ Թեքինը, պաշտպանության նախարար Յաշար Գյուլերը, առևտրի նախարար Օմեր Բոլաթը, տրանսպորտի և ենթակառուցվածքների նախարար Աբդուլքադիր Ուրալօղլուն, նախագահի աշխատակազմի հաղորդակցության տնօրեն Ֆահրեթթին Ալթունը, նախագահի գլխավոր խորհրդական, դեսպան Ակիֆ Չաղաթայ Քըլըչը։
Էրդողանը մասնակցելու է Թուրքիա-Հունաստան Բարձր մակարդակի համագործակցության խորհրդի հինգերորդ հանդիպմանը, նրան ընդունելու են վարչապետ Կիրիակոս Միցոտակիսն ու նախագահ Կատերինա Սաքելարոպուլուն։
Էրդողանը Միցոտակիսի հետ համատեղ ասուլիսից հետո կմասնակցի աշխատանքային ընթրիքի։ Նշվում է, որ քննարկվելու են Թուրքիա-Հունաստան հարաբերություններում win-win (հաղթել-հաղթել) սկզբունքին համապատասխան ձեռնարկվելիք քայլերը, նախատեսվում է հռչակագրի ստորագրում։
Հավելենք, որ 70 տարվա ընթացքում Էրդողանը Թուրքիայի երկրորդ նախագահն է, որն այցով մեկնում է Աթենք: Ընդհանուր առմամբ, սա Թուրքիայի ղեկավարի 3-րդն այցն է Հունաստան։ Մինչ այս, Էրդողանն այս երկիր էր այցելել 2017 թվականի դեկտեմբերի 7-ին, իսկ նրանից առաջ 1952 թվականին Աթենք էր ժամանել Թուրքիայի երրորդ նախագահ Մահմուդ Ջելալ Բայարը։
Էմմա Չոբանյան
