Քաղաքականություն
05.12.2023 | 20:49
Հաղորդումներից հետո, որ Իսրայելը հետապնդելու է ՀԱՄԱՍ-ի անդամներին Պաղեստինից դուրս, այդ թվում՝ Թուրքիայում, իսրայելական հետախուզական ստորաբաժանումները տեղեկացվել են, որ ցանկացած անօրինական գործողություն թուրքական տարածքում լուրջ հետևանքներ կունենա։ Անադոլու գործակալությանը թուրքական հետախուզության աղբյուրները հայտնել են, որ զրուցակիցներին արվել են անհրաժեշտ նախազգուշացումներ այն տեղեկությունների վերաբերյալ, որ Իսրայելը հետապնդելու է ՀԱՄԱՍ-ի անդամներին Պաղեստինից դուրս։
Թուրք պաշտոնյաները գործակալության հետ զրույցում նշել են, որ տարբեր հետախուզական ծառայություններ նախկինում փորձել են անօրինական գործողություններ իրականացնել Թուրքիայի տարածքում, և ընդգծել, որ որևէ ծառայության կողմից նման գործողությունները չեն հանդուրժվելու։
Հավելենք, որ Wall Street Journal-ը հայտնել էր, որ Իսրայելը ծրագրում է ոչնչացնել Պաղեստինից դուրս բնակվող ՀԱՄԱՍ-ի անդամներին։ Հրապարակման մեջ ասվում էր, որ իսրայելական հատուկ ծառայությունները հետապնդելու են ՀԱՄԱՍ-ի անդամներին Լիբանանում, Թուրքիայում և Կատարում։
Իսրայելի ներքին հետախուզական գործակալության տնօրեն Ռոնեն Բարը իսրայելական պետական KAN հեռուստատեսությամբ ցուցադրված ձայնագրության մեջ ասել էր, որ «մտադիր են սպանել ՀԱՄԱՍ-ի առաջնորդներին ամբողջ աշխարհում, այդ թվում՝ Կատարում, Թուրքիայում և Լիբանանում, եթե նույնիսկ դրա համար տարիներ պահանջվի»։
Հավելենք, որ Անկարան ՀԱՄԱՍ-ն ահաբեկչական կազմակերպություն չի ճանաչում ու բավական սերտ կապեր ունի դրա ղեկավարության հետ, որոնք հաճախ են այցելում Թուրքիա և հանդիպում Էրդողանին։ Ըստ տեղեկությունների՝ ՀԱՄԱՍ-ի անդամներից ոմանք ունեն նաև Թուրքիայի քաղաքացիություն։
Էմմա Չոբանյան
