Քաղաքականություն
04.12.2023 | 20:44
ԱՄՆ կառավարությունն Իրանին տրամադրել է բոլոր անհրաժեշտ երաշխիքները Վաշինգտոնում սառեցված ֆինանսական ակտիվների հետ կապված, այս պահին Թեհրանն ունի բոլոր ակտիվները և կարող է դրանք օգտագործել իր կարիքներին համապատասխան։ Այս մասին IRNA-ին ասել է ԱԳՆ պաշտոնական ներկայացուցիչ Նասեր Քանանին։
«Ամերիկյան կառավարությունը պետք է հավատարիմ մնա Իրանի հետ համաձայնագրով ստանձնած պարտավորություններին, և մենք ստացել ենք բոլոր անհրաժեշտ երաշխիքներն այս հարցում, քանի որ ԱՄՆ-ը ցույց է տվել իր անհուսալիությունը։ Ֆինանսական ռեսուրսները հասանելի են Իսլամական Հանրապետության կառավարությանը։ Մենք կարող ենք դրանք օգտագործել ըստ մեր կարիքների»,- հայտարարել է Քանանին։
Ավելի վաղ CBS հեռուստաալիքը հայտնել էր, որ ԱՄՆ-ը համաձայնել է Կատարի հետ, որ Իրանին պատկանող և գերիների փոխանակման համաձայնագրի շրջանակում ապասառեցված 6 միլիարդ դոլարը դեռ հասանելի չի լինի Թեհրանին։ Այս մասին գրել է նաև Washington Post-ը։
ԱՄՆ պետքարտուղար Էնթոնի Բլինքենն էլ հայտարարել էր, որ ԱՄՆ-ն իրեն իրավունք է վերապահում սառեցնել Իրանի 6 միլիարդ դոլարը Կատարի բանկում, սակայն դեռ ուշադիր հետևում է դրա հնարավոր օգտագործմանը:
