24.04.2026 | 22:14
Երևանի և 10 մարզի մի շարք հասցեներում էլեկտրաէներգիայի անջատումներ կլինեն
ՄԱԿ-ի հատուկ զեկուցողը Բաքվին մտահոգություն է հայտնել Արցախում հայկական պատմամշակութային և կրոնական վայրերի շարունակական ոչնչացման և յուրացման վերաբերյալ
Քաղաքականություն
01.12.2023 | 14:12
ՄԱԿ-ի մշակութային իրավունքների հարցերով հատուկ զեկուցողն Ադրբեջանին ուղղված ուղերձում մտահոգություն է հայտնել ԼՂ-ում հայկական պատմական, մշակութային և կրոնական նշանակալի վայրերի ու օբյեկտների ոչնչացման և յուրացման շարունակական օրինակաչափության վերաբերյալ։ Այս մասին հայտնում է Շվեյցարիայում ՀՀ դեսպանությունը X-ում գրառմամբ։
Նշվում է, որ Լեռնային Ղարաբաղի պատմության կազմակերպված վերաիմաստավորումը նպատակ ունի ջնջել հայերի ներկայության հետքերը, իսկ տարածաշրջանում հայերի նկատմամբ խտրական պատմությունները և հալածանքների նարատիվները խախտում են մարդու իրավունքների միջազգային չափանիշները և միջազգային մարդասիրական իրավունքը։
«Ինձ հատկապես անհանգստացնում են այն պնդումները, որ մարդկանց, հուշարձանների և խորհրդանիշների վրա հարձակումները, պատմական նարատիվների կեղծումը և տեղանունների ջնջումը, հայերի մասին բացասական խոսակցությունները կարող են վերածվել մշակութային զտումների»,- նշում է ՄԱԿ-ի զեկուցողը։
Նա ընդգծում է, որ «Արդարադատության միջազգային դատարանը, Եվրախորհրդարանը և Եվրոպայի խորհուրդը մտահոգություն են հայտնել Ադրբեջանում զարգացող նարատիվի վերաբերյալ, որը խթանում է «կովկասյան ալբանական» ժառանգությունը՝ փոխարինելու հայկական մշակութային ժառանգությանը և ներկայությանն ու այն ժխտող ռևիզիոնիստական միտումը։ Տարածաշրջանի արվեստի, ճարտարապետության և հնագիտության հարցերով փորձագետների ճնշող մեծամասնությունը հերքում է այս պնդումները՝ դրանք որակելով կեղծ։
Զեկուցողը նշում է, որ «2022 թվականի դեկտեմբերի 12-ից Լեռնային Ղարաբաղը Հայաստանին կապող Լաչինի միջանցքն արգելափակվել է՝ խախտելով 2020 թվականի նոյեմբերի 9-ի եռակողմ հրադադարի մասին հայտարարությամբ Ադրբեջանի ստանձնած պարտավորությունները։ Ճանապարհների փակման անմիջական հետևանքով 120,000 մարդ մեկուսացվել և զրկվել է տարբեր ապրանքներից և ծառայություններից, ինչը ստեղծել է մարդասիրական ճգնաժամ և կործանարար հետևանքներ ունեցել մարդու բազմաթիվ իրավունքների վրա։
«Պնդում կա, որ տարածաշրջանն էթնիկ հայերից մաքրելուց հետո Ադրբեջանը նախատեսում է հետագայում վերացնել հայերի ներկայության բոլոր ֆիզիկական նշանները»,- եզրափակում է ՄԱԿ-ի հատուկ զեկուցողը։
Էմմա Չոբանյան
