20.02.2026 | 16:46
ՀՀ փոխվարչապետն ու Վրաստանի էկոնոմիկայի նախարարն անդրադարձել են «Խաղաղության խաչմերուկ» նախաձեռնությանը
Գազայի հատվածում քառօրյա զինադադարը սկսվել է
Քաղաքականություն
24.11.2023 | 10:58
Գազայի հատվածում Իսրայելի և ՀԱՄԱՍ-ի միջև ռազմական գործողությունների քառօրյա դադարի մասին համաձայնությունն ուժի մեջ է մտել։ Օրվա ընթացքում գրոհայինները պետք է ազատ արձակեն իսրայելցի առաջին պատանդներին՝ մոտավորապես տեղական ժամանակով ժամը 16:00-ին, գրում է BBC-ի ռուսական ծառայությունը։
Համաձայնագրի շրջանակում, որում առանցքային միջնորդ են եղել Կատարի իշխանությունները, ինչպես նաև Եգիպտոսն ու ԱՄՆ-ը, ՀԱՄԱՍ-ի զինյալներն այսօր կազատեն 13 իսրայելցի պատանդի։ Ընդհանուր առմամբ, նախատեսվում է առնվազն 50 հոգու ազատ արձակում։ Իսրայելի բանտերից կազատվեն 39 պաղեստինցի բանտարկյալներ՝ կանայք և անչափահասներ։
Գազայի հատվածի՝ Եգիպտոսի հետ սահմանին գտնվող «Ռաֆահ» անցակետով ամեն օր նախատեսվում է ուղարկել 130 հազար լիտր դիզվառելիք և 200 բեռնատար մարդասիրական օգնություն։
BBC-ի հաղորդմամբ՝ Գազայի հատվածում իսրայելական օդուժի գործողությունները կդադարեցվեն պատանդների ազատ արձակումից վեց ժամ առաջ։ Իսրայելցի պատանդները նախ կտեղափոխվեն Եգիպտոս, պաղեստինցի բանտարկյալները՝ Արևմտյան ափ, որը վերահսկվում է Պաղեստինի ինքնավարության կողմից։
Իսրայելի իշխանությունները, ըստ լրատվամիջոցների, հայտարարել են, որ չեն ազատի պաղեստինցիներին, քանի դեռ չեն տեսել իրենց քաղաքացիներին։
Ռազմական գործողությունների առաջին դադարը տեղի է ունենում Իսրայելի և ՀԱՄԱՍ-ի միջև պատերազմի 49-րդ օրը։
