15.09.2026 | 17:53
Հայտնի է՝ որ ստադիոններն են ընդունելու եվրագավաթների եզրափակիչներն առաջիկա տարիներին
Ուկրաինան սպասում է դեկտեմբերին ԵՄ-ի հետ անդամակցության շուրջ բանակցություններ սկսելու որոշմանը
Քաղաքականություն
22.11.2023 | 14:50
Ուկրաինայի նախագահ Վլադիմիր Զելենսկին հույս ունի, որ ԵՄ-ն մինչև այս տարեվերջ որոշում կկայացնի Եվրամիությանը Կիևի անդամակցության հարցի շուրջ բանակցությունների մեկնարկի հարցով։ Զելենսկին նաև նշել է, որ Կիևում Եվրոպական խորհրդի նախագահ Շառլ Միշելի հետ բանակցությունների ընթացքում կողմերը քննարկել են Ուկրաինայի առաջընթացը Եվրահանձնաժողովի առաջարկությունների կատարման հարցում, գրում է DW-ի ռուսական ծառայությունը։
«Մենք իրականացնում ենք այն ամենը, ինչ պետք է անի Ուկրաինան: Մենք հավատում ենք, որ Եվրամիությունը պատրաստ կլինի իր հերթին ընդառաջ գնալ, ինչպես խոստացել էր, որպեսզի մինչև տարեվերջ՝ դեկտեմբերին, արդյունքը լինի քաղաքական որոշումը՝ անդամակցության բանակցությունները սկսելու և գործընթացը լիարժեք ինտեգրմանը մոտեցնելու հարցում»,- գրել է Ուկրաինայի նախագահ Տելեգրամի իր ալիքում։
Կիևում Շառլ Միշելի և Մոլդովայի նախագահ Մայա Սանդուի հետ համատեղ մամուլի ասուլիսում Զելենսկին ընդգծել է, որ կանի հնարավորը՝ համոզելու գործընկերներին դեկտեմբերին որոշում կայացնելու անհրաժեշտության մեջ։
Շառլ Միշելն էլ զգուշացրել է, որ ԵՄ-ին Ուկրաինայի անդամակցության շուրջ պաշտոնական բանակցություններ սկսելու որոշում կայացնելը դժվար կլինի, միևնույն ժամանակ, չի բացառել դրական արդյունքը։ Նա բարեփոխումների իրականացման հարցում Կիևի առաջընթացը տպավորիչ է անվանել և ընդգծել, որ կանի հնարավոր ամեն բան՝ հասնելու ԵՄ բոլոր 27 երկրների համաձայնությանը։
«Դժվար հանդիպում է լինելու, բայց ես չեմ հանձնվի»,- ասել է Միշելը։
Մայա Սանդուն իր հերթին կոչ է արել ԵՄ-ին կատարել Քիշնևին ու Կիևին տված խոստումը և սկսել բանակցությունները հնարավորինս շուտ։ Նա նշել է, որ ԵՄ-ի որոշմանը, որը տատանվում է բանակցությունների բացման հարցում, այժմ հետևում են Մոսկվայում, ուստի Բրյուսելը պետք է ՌԴ-ին ազդանշան տա Ուկրաինային և Մոլդովային իր անմնացորդ աջակցության մասին։
Էմմա Չոբանյան
