16.12.2025 | 19:13
Հայաստանի Սահմանադրությունը պետք է համապատասխանեցվի նախաստորագրված խաղաղության համաձայնագրին. Ալիևի ներկայացուցիչ
Իսրայելի և ՀԱՄԱՍ-ի միջև պատերազմն արդեն 48 լրագրողի կյանք է խլել. CPJ
Քաղաքականություն
20.11.2023 | 17:39
Իսրայելի և ՀԱՄԱՍ-ի միջև պատերազմի մեկնարկից ի վեր լրատվամիջոցների 48 աշխատակիցներ են սպանվել իրենց պարտականությունները կատարելիս։ Այս մասին հայտնել է Լրագրողների պաշտպանության կոմիտեն (CPJ), փոխանցում է BBC-ի ռուսական ծառայությունը:
Ըստ կազմակերպության՝ լրագրողների համար ամենամահաբերը եղել է պատերազմի առաջին օրը՝ հոկտեմբերի 7-ը, երբ ՀԱՄԱՍ-ի զինյալները հարձակվել են Իսրայելի վրա․ այդ օրը սպանվել է 6 լրագրող։ Անցած շաբաթ օրը՝ նոյեմբերի 18-ին, մահացել է 5 մարդ։
«Գազայում լրագրողները բախվում են հատկապես բարձր ռիսկերի, երբ փորձում են լուսաբանել հակամարտությունը Իսրայելի ցամաքային հարձակման ժամանակ, ներառյալ՝ ավերիչ իսրայելական ավիահարվածները, կապի խափանումը, մատակարարումների պակասը և էլեկտրաէներգիայի համատարած անջատումները»,- ասում է CPJ-ն:
Կազմակերպության տվյալներով՝ սպանված 48 լրագրողների ու լրատվամիջոցների աշխատակիցներից 43-ը պաղեստինցիներ են, 4-ը՝ իսրայելցի, 1-ը՝ լիբանանցի։ 9 լրագրող վիրավորվել է, 3-ը համարվում է անհետ կորած, 13-ը ձերբակալվել է։
