24.11.2024 | 13:40
Օդի ջերմաստիճանը կնվազի 6-10 աստիճանով
Ֆինլանդիան հայտարարել է Ռուսաստանի հետ սահմանային անցակետի փակման մասին
Քաղաքականություն
16.11.2023 | 19:49
Ֆինլանդիայի կառավարությունը որոշել է փակել Ռուսաստանի հետ սահմանին գտնվող ինը անցակետերից չորսը։ Խոսքը Վաալիմաա (ռուսական կողմից սա Տորֆյանովկա անցակետն է), Նույամաա (Բրուսնիչնոյե), Իմատրա (Սվետոգորսկ) և Նիիրալա (Վյարտսիլյա) սահմանային անցակետերի մասին է, որոնք փակ կլինեն այս տարվա նոյեմբերի 18-ից մինչև առնվազն 2024 թվականի փետրվարի 18-ը։ Այս մասին ասվում է Ֆինլանդիայի Նախարարների կաբինետի կայքում հրապարակված հաղորդագրությունում։
Որոշումն ընդունվել է Ռուսաստանի տարածքից ժամանող անօրինական միգրանտների թվի աճի պատճառով։ Սեպտեմբերից այս կերպ Ֆինլանդիայի սահման է ժամանել Իրաքի, Եմենի, Սոմալիի, Սիրիայի և այլ երկրների 280 քաղաքացիներ։ Նրանք բոլորն ապաստան են խնդրել։
Yle-ի փոխանցմամբ՝ մինչ այս ռուս սահմանապահները թույլ չէին տալիս մարդկանց մոտենալ Ֆինլանդիայի սահմանին, եթե նրանք երկիր մուտք գործելու համար համապատասխան փաստաթղթեր չունեին։ Բայց հոկտեմբերի վերջից նրանք դադարեցրին վիզա չունեցող մարդկանց արգելել մոտենալ սահմանին։
Ֆինլանդիայի նախագահ Սաուլի Նիինիստյոն ներգաղթյալներին սահման թույլատրելու մասին Ռուսաստանի որոշումը կապել է Հելսինկիի և Վաշինգտոնի միջև պաշտպանական համագործակցության համաձայնագրի հետ։ Նա նաև կոչ է արել նախապատրաստվել Ռուսաստանից «վատությունների»՝ ՆԱՏՕ-ին անդամակցելուց հետո։
«Արևելյան սահմանի սահմանային անցակետերի փակումը կկանգնեցնի անօրինական միգրանտների մուտքը Ֆինլանդիա։ Անհրաժեշտության դեպքում՝ կառավարությունը պատրաստ է է՛լ ավելի կտրուկ միջոցներ ձեռնարկել»,- ասել է Ֆինլանդիայի ներքին գործերի նախարար Մարի Ռանտանենը։
