18.12.2025 | 17:35
Եկել եմ աջակցելու եպիսկոպոսներին. Նարեկ Գրիգորյան․ ՏԵՍԱՆՅՈՒԹ
ՄԱԿ-ի ԱԽ-ն Գազայի հատվածում հումանիտար դադարների պահանջով բանաձև է ընդունել
Քաղաքականություն
16.11.2023 | 12:07
ՄԱԿ-ի Անվտանգության խորհուրդը բանաձև է ընդունել, որը կոչ է անում անհապաղ և երկարատև հումանիտար դադար հաստատել Գազայում, ինչպես նաև մարդասիրական միջանցքներ ստեղծել էքսկլավի ողջ տարածքում խաղաղ բնակիչներին օգնելու համար: Բանաձևում նաև կոչ է արվում ՀԱՄԱՍ-ին՝ անհապաղ ազատ արձակել պահվող բոլոր պատանդներին, գրում է DW-ի ռուսական ծառայությունը։
Փաստաթուղթը քվեարկության է դրվել Մալթայի կողմից։ Նրա օգտին քվեարկել են Անվտանգության խորհրդի 15 անդամներից 12-ը։ Մյուս երեքը՝ ԱՄՆ-ը, Մեծ Բրիտանիան և Ռուսաստանը, ձեռնպահ են մնացել։ ՄԱԿ-ի աղբյուրները լրագրողներին հայտնել են, որ բանաձևը քվեարկության չի դրվել այնքան ժամանակ, քանի դեռ դրա հեղինակները «համեմատաբար վստահ չեն եղել հաջողության մեջ»:
Իսրայելը մերժել է բանաձևը։ Երկրի ԱԳՆ-ն հայտարարել է, որ քանի դեռ ՀԱՄԱՍ-ը շարունակում է պատանդներ պահել, նման միջոցները տեղին չեն։ Բանաձևը քննադատության է ենթարկել ՄԱԿ-ում Իսրայելի ներկայացուցիչ Գիլադ Էրդանը։ Նրա խոսքով, «փաստաթուղթը կտրված է իրականությունից», և Անվտանգության խորհուրդը «շարունակում է անտեսել և հրաժարվում է դատապարտել կամ նույնիսկ հիշատակել հոկտեմբերի 7-ին ՀԱՄԱՍ-ի կողմից իրականացված ջարդը»։
«ՀԱՄԱՍ»-ի ռազմավարությունն է՝ միտումնավոր վատթարացնել հումանիտար իրավիճակը Գազայի հատվածում և ավելացնել պաղեստինցիների շարքում զոհերի թիվը, որպեսզի ստիպեն ՄԱԿ-ին և Անվտանգության խորհրդին կանգնեցնել Իսրայելին։ Դա տեղի չի ունենա։ Իսրայելը կշարունակի գործել այնքան ժամանակ, քանի դեռ ՀԱՄԱՍ-ը չի ոչնչացվել և պատանդները չեն վերադարձվել»,- ասել է նա։
Հավելենք, որ մինչ այս Գազայի հատվածում իրավիճակի սրումից ի վեր ՄԱԿ-ի Անվտանգության խորհուրդը չորս անգամ չէր կարողացել դրա վերաբերյալ բանաձև ընդունել։
