19.08.2026 | 12:42
Ուֆայում ուկրաինական ԱԹՍ-ների հարձակման հետևանքով նավթավերամշակման գործարանում հրդեհ է բռնկվել․ մեկ վիրավոր կա
Բաքվում Իրանի դեսպանը հայտարարել է, թե «Ղարաբաղի հայերի իրավունքների և անվտանգության հարցերը պետք է կարգավորվեն Ադրբեջանի օրենքներով»
Քաղաքականություն
15.11.2023 | 17:49
Ղարաբաղի հայերի իրավունքների և անվտանգության հարցերը պետք է կարգավորվեն բացառապես Ադրբեջանի օրենքներով։ Ադրբեջանական լրատվամիջոցների հաղորդմամբ՝ X սոցիալական ցանցում այս մասին գրել է Բաքվում Իրանի դեսպան Աբբաս Մուսավին։
«Իրանի սկզբունքային դիրքորոշումը միշտ եղել է այն, որ Ղարաբաղը պատկանում է Ադրբեջանին։ Իրանը ողջունել է տարածքային ամբողջականության վերականգնումը և Ղարաբաղի վերադարձն Ադրբեջանի ինքնիշխանությանը։ Ղարաբաղում հայերի իրավունքների և անվտանգության ապահովումն իմաստ ունի միայն Ադրբեջանի օրենսդրությանը համապատասխան»,- ասվում է դեսպանի գրառման մեջ։
Հավելենք, որ ՀՀ-ում Իրանի դեսպան Մեհդի Սոբհանին հայտարարել էր, որ Իրանը հանդիսանում է ԼՂ բնակիչների օրինական իրավունքների ապահովման կողմնակից։ Նա, մասնավորապես, նշել էր, որ Ղարաբաղի հարցում Թեհրանը, միջազգային նորմերին համապատասխան, ճանաչում է ինչպես Հայաստանի, այնպես էլ Ադրբեջանի տարածքային ամբողջականությունը։
«Բայց դա չի նշանակում, որ այնտեղ ապրող մարդկանց իրավունքները պետք է ոտնահարվեն։ Մենք կարծում ենք, որ Ղարաբաղի ժողովրդի իրավունքները պետք է ապահովվեն, նրանք պետք է հնարավորություն ունենան իրացնել իրենց իրավունքները։ Սա իրողություն է, որը ոչ ոք, այդ թվում՝ Ադրբեջանը, չի կարող անտեսել»,- ասել էր դեսպանը։
Այս հայտարարություններն առաջացրել էին պաշտոնական Բաքվի դժգոհությունը։
Էմմա Չոբանյան
