22.02.2026 | 00:10
Արթուր Ավետիսյանը՝ աշխարհի գավաթի հաղթող, Մամիկոն Խաչատրյանը՝ արծաթե մեդալակիր
Մեկնարկում է Խաչատրյանի անվան 11-րդ միջազգային փառատոնը
Մշակույթ
15.11.2023 | 12:02
Նոյեմբերի 16-ին կմեկնարկի Խաչատրյանի անվան 11-րդ միջազգային փառատոնը։ Այն կազմակերպվել է «Արամ Խաչատրյան» մշակութային հիմնադրամի և Հայաստանի պետական սիմֆոնիկ նվագախմբի հետ համատեղ։ Փառատոնի անցկացմանն աջակցում են ՀՀ կրթության‚ գիտության‚ մշակույթի և սպորտի նախարարությունը և Երևանի քաղաքապետարանը։
Խաչատրյանի անվան 11-րդ միջազգային փառատոնը նվիրված է Արամ Խաչատրյանի 120-ամյակին։ Մեծ կոմպոզիտորի անունը կրող փառատոնը կշարունակվի մինչև դեկտեմբերի 16-ը։ Մեկ ամսվա ընթացքում կհրավիրվի 5 սիմֆոնիկ համերգ‚ որոնց ընթացքում կներկայանան անվանի մենակատարներ։ Հայաստանի պետական սիմֆոնիկ նվագախմբի հետ ելույթ կունենան թավջութակահարներ Նարեկ Հախնազարյանը‚ Աստղիկ Սիրանոսյանը‚ ջութակահար Ստելլա Չենը‚ դաշնակահար Ժան-Պոլ Գասպարյանը։
Փառատոնի առանցքում լինելու են Խաչատրյանի ստեղծագործությունները։ Կհնչեն մեծ կոմպոզիտորի կոնցերտները‚ հատվածներ «Սպարտակ» և «Գայանե» բալետներից‚ Թիվ 2՝ «Զանգով սիմֆոնիան» և այլ սիմֆոնիկ ստեղծագործություններ։ Փառատոնային ծրագրում ընդգրկված է նաև ունկնդրի կողմից շատ սիրված «Սիմֆոնիկ Ջազ «Խաչատրյան» համերգը։ Կներկայացվի նաև Խաչատրյանի կինոերաժշտությունը. կհնչեն «Պեպո»‚ «Գաղտնի առաքելություն»‚ «Ծովակալ Ուշակով»‚ «Անմար կրակը»‚ «Ստալինգրադի ճակատամարտը»‚ «Զանգեզուր» ֆիլմերի մեղեդիները։
Համերգները կղեկավարեն Հայաստանի պետական սիմֆոնիկ նվագախմբի գեղարվեստական ղեկավար և գլխավոր դիրիժոր Սերգեյ Սմբատյանը և նվագախմբի ընթացիկ համերգաշրջանի գլխավոր հրավիրյալ դիրիժոր Ջանլուկա Մարչիանոն։
Խաչատրյանի անվան միջազգային փառատոնը 2021 թվականի նոյեմբերից Եվրոպական փառատոների ասոցիացիայի (The European Festivals Association, EFA) անդամ է։
Խաչատրյանի անվան փառատոնի համերգների ունկնդիրներին հնարավորություն կընձեռվի միանալ Հայաստանի պետական սիմֆոնիկ նվագախմբի՝ հաջակցություն ՅՈՒՆԻՍԵՖ-ի նախաձեռնությանը։ Ունկնդիրները, նվագախմբի գործընկերներն ու բոլոր բարեկամները իրենց նվիրատվություններով կկարողանան հոգալ արցախցի երեխաների ամենաառաջնային կարիքները և նպաստել, որ նրանց հասանելի լինեն սոցիալ-հոգեբանական, առողջապահական, երեխաների պաշտպանության, վաղ մանկական ուսումնառության և այլ ծառայությունները: Փառատոնի համերգների տոմսերը կվաճառվեն նվազագույն արժեքով՝ բոլորին քաջալերելով հաճախել համերգներին և ցանկության դեպքում հանգանակել հենց համերգասրահում թե՛ կանխիկ և թե՛ անկանխիկ եղանակներով։
