23.11.2024 | 00:35
Թրամփի հետ հեռախոսազրույցը տեղեկատվական էր, բայց նաև շատ պոզիտիվ. Փաշինյան. ՏԵՍԱՆՅՈՒԹ
Ալիևը խոստովանել է ՀՀ սուվերեն տարածքների օկուպացիայի փաստը
Քաղաքականություն
08.11.2023 | 17:46
Ադրբեջանի նախագահ Իլհամ Ալիևը էթնիկ զտման ենթարկած Ստեփանակերտում այսօր անցկացված զորահանդեսի ժամանակ հերթական անգամ հայատյաց հայտարարություններ ու սպառնալիքներ է հնչեցրել։ Ալիևը նաև խոստովանել է իր կողմից միջազգային իրավունքի խախտմամբ Հայաստանի վրա ռազմական հաձակումներն ու ՀՀ սուվերեն տարածքների օկուպացիան, որոնք տեղի են ունեցել Արցախյան 44-օրյա պատերազմից հետո, ինչպես 2021 թ-ի մայիսին, այնպես էլ 2022 թ-ի սեպտեմբերին։
«Մենք անմիջապես գրավեցինք Ղարաբաղի տարածաշրջանի բոլոր կարևոր կետերը։ Միևնույն ժամանակ, մենք վերահսկողություն հաստատեցինք ադրբեջանա-հայկական սահմանի վրա»,- ասել է Ալիևը՝ ընդգծելով, որ ադրբեջանական ԶՈՒ-ն «աստիճանաբար բարելավում է դիրքերը սահմանին և տարբեր միջոցառումների արդյունքում հայ-ադրբեջանական սահմանի հիմնական մասում ավելի գերիշխող դիրքեր ունի»։
«Մենք գիտեինք, որ ռևանշիստական ուժերը Հայաստանում գլուխ են բարձրացնում։ Մենք գիտեինք, որ Հայաստանի թիկունքին կանգնած արտաքին ուժերը մեր դեմ գործելու դրդմամբ կրկին սադրիչ ազդանշաններ կուղարկեն նրան։ Ուստի՝ մեզ անհրաժեշտ էր պաշտպանել մեր սահմանը, և մի քանի ռազմական գործողությունների արդյունքում այսօր ադրբեջանա-հայկական սահմանին իրավիճակը մեր վերահսկողության տակ է»,-հայտարարել է Ալիևը։
Ի դեպ, նա ևս մեկ արդարացրել է Արցախում իրականացրած ռազմական ագրեսիան ու հանցագործությունները, որոնք տեղի են ունեցել ոչ միայն սեպտմբերի 19-ին, այլև 44-օրյա պատերազմին հաջորդած երեք տարիների ընթացքում։ Խոսքը Փառուխի, Սարիբաբայի ու այլ ռազմական գործողությունների մասին է։
Էմմա Չոբանյան
