24.11.2024 | 11:53
Մխիթարյանն սկսել է ինքնակենսագրական գիրք գրել
G7-ի երկրները վերահաստատել են Իսրայելի ինքնապաշտպանության իրավունքը, նաև «մարդասիրական դադարների» կոչ արել
Քաղաքականություն
08.11.2023 | 17:37
Ճապոնիայում ինտենսիվ բանակցություններից հետո առաջատար արդյունաբերական տերությունների՝ G7-ի արտաքին գործերի նախարարների ղեկավարները միասնական դիրքորոշում են հայտնել Իսրայելի և ՀԱՄԱՍ-ի միջև պատերազմի վերաբերյալ, գրում է BBC-ի ռուսական ծառայությունը։
Համատեղ հայտարարության մեջ նախարարները դատապարտել են ՀԱՄԱՍ-ին, պաշտպանել Իսրայելի ինքնապաշտպանության իրավունքը և կոչ արել «մարդասիրական դադար» անել՝ արագացնելու Գազայի հատվածում պաղեստինցի խաղաղ բնակիչներին օգնության տրամադրումը:
ԱՄՆ, Մեծ Բրիտանիայի, Կանադայի, Ֆրանսիայի, Գերմանիայի, Ճապոնիայի և Իտալիայի արտաքին գործերի նախարարներն «ընդգծել են Իսրայելի իրավունքը՝ պաշտպանելու իրեն և իր ժողովրդին միջազգային իրավունքի համաձայն՝ ձգտելով կանխել ՀԱՄԱՍ-ի հարձակումներն Իսրայելի վրա»։ Նրանք նաև աջակցություն են հայտնել «մարդասիրական դադարներին՝ նպաստելու շտապ օգնությանը, քաղաքացիական անձանց տեղահանմանը և պատանդների ազատմանը»:
Հայտարարության մեջ կոչ է արվում Իրանին «ձեռնպահ մնալ ՀԱՄԱՍ-ին աջակցելուց և հետագա գործողություններից, որոնք ապակայունացնում են իրավիճակը Մերձավոր Արևելքում, ներառյալ աջակցությունը լիբանանյան «Հըզբոլլահ»-ին և այլ ոչ պետական դերակատարներին, նաև օգտագործել իր ազդեցությունն այդ խմբերի վրա՝ տարածաշրջանային լարվածությունը թուլացնելու համար»։
Փաստաթուղթը նաև դատապարտում է արևմտյան ափում «ծայրահեղական վերաբնակիչների կողմից բռնության աճը պաղեստինցիների նկատմամբ», ինչը, նախարարների կարծիքով, «անընդունելի է, խաթարում է անվտանգությունը Հորդանան գետի արևմտյան ափում և վտանգում կայուն խաղաղության հեռանկարները»:
