Քաղաքականություն
07.11.2023 | 13:42
Իսրայելը պատրաստ է դիտարկել Գազայի հատվածում մարտերի ընթացքում «փոքր մարտավարական դադարների» հնարավորությունը։ Այս մասին հայտարարել է Իսրայելի վարչապետ Բենիամին Նեթանյահուն։
Նրա խոսքով՝ դադարներ կարող են արվել՝ հեշտացնելու հումանիտար օգնության առաքումը, ինչպես նաև ՀԱՄԱՍ-ի զինյալների կողմից պատանդների ազատ արձակումը թույլ տալու համար, գրում է DW-ի ռուսական ծառայությունը:
Միևնույն ժամանակ, Իսրայելը մերժում է զինադադարը և չի ընդունում որևէ թուլացում, եթե ազատ չեն արձակվել բոլոր այն մարդիկ, ովքեր պատանդ են վերցվել և տարվել Գազայի հատված, որը ղեկավարվում է Իսրայելում, Եվրամիությունում, ԱՄՆ-ում և մի շարք այլ երկրներում ահաբեկչական կազմակերպություն ճանաչված ՀԱՄԱՍ խմբավորման կողմից:
Այս հայտարարությունները Նեթանյահուն արել է ամերիկյան ABC News հեռուստաալիքի եթերում, երբ նրան հարցրել են, թե ով է կառավարելու Գազայի հատվածը ռազմական գործողությունների ավարտից հետո։
«Կարծում եմ, որ Իսրայելը պետք է անորոշ ժամանակով ստանձնի անվտանգության ընդհանուր պատասխանատվությունը, քանի որ մենք տեսել ենք, թե ինչ է տեղի ունենում, երբ մենք չենք կրում նման պատասխանատվություն»,- հավելել է Նեթանյահուն։
