20.02.2026 | 18:24
ԵՄ-ում չեն կարողացել համաձայնության գալ ՌԴ-ի դեմ պատժամիջոցների 20-րդ փաթեթի շուրջ
Ադրբեջանը հայտնել է ևս մեկ արցախցու առևանգման և շինծու մեղադրանքներ առաջադրելու մասին
Քաղաքականություն
02.11.2023 | 14:18
Ադրբեջանը սեպտեմբերի 19-ին Արցախի դեմ իրականացված ռազմական հարձակումից հետո ևս մեկ արցախցու է առևանգել։ Ադրբեջանի Պետական անվտանգության ծառայությունը հայտարարություն է տարածել՝ նշելով, թե «2023 թվականի սեպտեմբերին տեղական հակաահաբեկչական միջոցառումների արդյունքում ահաբեկչություն կատարելու կասկածանքով Քալբաջարի շրջանի Գյոզլու Քերփյու գյուղում ձերբակալվել և զինաթափվել է ապօրինի զինված խմբավորումների անդամ Մադաթ Բաբայանը»։
Ադրբեջանական կողմի տարածած տեղեկատվությունից կարելի է ենթադրել, որ սեպտեմբերի 19-ի հարձակումից և Արցախի Գետավան գյուղի գրավումից հետո Մադաթ Բաբայանը հայտնվել է ադրբեջանական գերության մեջ։ Ավելի քան մեկ ամիս անց Բաքուն նրան շինծու մեղադրանքներ է առաջադրել։
Նշվում է, թե Բաբայանը, իբր, «մասնակցել է Խոջալուի ջարդերին, նաև խոստովանական ցուցմունք տվել»։
Հավելենք, որ Արցախում էթնիկ զտումից հետո Բաքվի կողմից առևանգվել և ապօրինի պահվում են Արցախի նախկին նախագահներ Արայիկ Հարությունյանը, Բակո Սահակյանն ու Արկադի Ղուկասյանը, ԱԺ նախագահ Դավիթ Իշխանյանը, նախկին պետնախարար Ռուբեն Վարդանյանը, նախկին ԱԳ նախարար Դավիթ Բաբայանը, ՊԲ նախկին հրամանատար Լևոն Մնացականյանն ու ՊԲ փոխհրամանատար Դավիթ Մանուկյանը։
Բոլոր գերեվարվածների մասին ստույգ տվյալներ չկան։
Էմմա Չոբանյան
