16.09.2026 | 00:14
Կռվախնձոր դարձած դուռն ու արտահերթ ընտրությունների նախերգանքը․ Գյումրիի ավագանու նիստը լարվեց. ՏԵՍԱՆՅՈՒԹ
Ջուզեպպե Վերդիի դրամատիկ «Պարահանդես-դիմակահանդես» օպերայի համերգային կատարումները կհնչեն Երևանում
Մշակույթ
02.11.2023 | 10:56
Իտալացի ականավոր կոմպոզիտոր Ջուզեպպե Վերդիի «Պարահանդես-դիմակահանդես» օպերան, որը Հայաստանում հազվադեպ է հնչում, համերգային կատարումներով կներկայացվի Երևանում․ տեղեկացնում են ՀՀ ԿԳՄՍՆ-ից։
Երեկոն, որը կազմակերպվում է Երևանյան 15-րդ միջազգային երաժշտական փառատոնի շրջանակում, տեղի կունենա նոյեմբերի 3-ին «Արամ Խաչատրյան» համերգասրահում:
Հայաստանի ազգային ֆիլհարմոնիկ նվագախմբի նվագակցությամբ և դիրիժոր, գեղարվեստական ղեկավար Էդուարդ Թոփչյանի ղեկավարությամբ համերգին գլխավոր դերերով հանդես կգան հրավիրյալ անվանի օպերային մեներգիչներ Մարսելո Պուենտեն (տենոր), Բոգդան Բաչուն (բարիտոն), Եվգենիա Մուրավյովան (սոպրանո), Յուլիա Մեննիբաևան (մեցցո-սոպրանո), Оլգա Պուդովան (սոպրանո): Դերակատարներից են Աշոտ Ղանթարջյանը (բաս), Հովհաննես Ներսեսյանը (բաս), Հայկ Տիգրանյանը (բաս), Արամո Մամիկոնյանը (տենոր), Ալեն Մանուկյանը (տենոր):
Օպերայի կատարմանը մասնակցում են Հայաստանի ազգային ակադեմիական երգչախումբը (գեղարվեստական ղեկավար և գլխավոր դիրիժոր՝ Հովհաննես Չեքիջյան) և Ձայնի պահպանման վոկալ-երգչախմբային մասնագիտական դպրոցի երգչախումբը (գեղարվեստական ղեկավար՝ Կարինե Առաքելյան, խմբավար՝ Էմմա Առաքելյան):
Նվագախմբի դիրիժոր Էդուարդ Թոփչյանը Մոսկվայի Բոլշոյ թատրոնում բազմիցս ղեկավարել է օպերան, որը բեմադրել է հայտնի օպերային ռեժիսոր Դավիթ Լիվերմուրը: Նա մեծ փափագով սպասում է օպերան հայրենիքում ներկայացնելուն: Թոփչյանը Բոլշոյ թատրոնում պարբերաբար ղեկավարում է նաև Պուչինիի «Տոսկա» և Վերդիի «Լուիզա Միլլեր» օպերաները:
Վառ մեղեդիներով հարուստ, դրամատիկ ու հոգեբանական ճշմարտացիությամբ աչքի ընկնող «Պարահանդես-դիմակահանդես» օպերան Վերդիի ժառանգության գագաթնակետերից է:
Հոգեբանական կոնֆլիկտները, զգացմունքների պայքարն Ամելիայի, Ռենատոյի և Ռիկարդոյի միջև արտահայտված են շեքսպիրյան ոգու հզորությամբ: Գործողությունները լի են սուր հակադրություններով. մռայլ տեսարաններին փոխարինում են ուրախ տեսարանները, իսկ դրամատիկ հանգուցալուծումը՝ կոմս Ռիկարդոյի սպանությունը, տեղի է ունենում պարահանդեսի ֆոնին: Օպերայի պրեմիերան տեղի է ունեցել 1859 թվականի փետրվարի 17-ին Հռոմի «Ապոլո» թատրոնում:
